Ханхүү Харри шинэ ажилд оржээ
Язгууртны хэргэм зэргээ орхиж, эгэл амьдралыг сонгосон ханхүү Харри, түүний гэргий Меган Мэркл нар АНУ-ын Калифорни мужид суурьшжээ. Учир нь ханхүү Харри Цахиурын хөндийн BetterUp нэртэй старт-ап компанид Нөлөөллийн албаны гүйцэтгэх захирлаар томилогдсон байна. BetterUp нь көүчинг, сэтгэцийн эрүүл мэндийн асуудлаар үйлчилгээ үзүүлдэг компани аж.
Тэрбээр бүтээгдэхүүнтэй холбоотой стратегийн шийдвэр гаргах, буяны үйлсэд хувь нэмрээ оруулах, сэтгэцийн эрүүл мэндтэй холбоотой сэдвүүдийг олон нийтэд сурталчлах, түгээн дэлгэрүүлэх ажлыг хийнэ гэжээ.
Үүнээс өмнө хос хоёр Netflix-тэй хамтран ажиллахаар тохиролцсоноос гадна Spotify компанитай гэрээ байгуулан, подкаст цацаж эхэлсэн билээ. Түүнчлэн ханхүү Харри одоогоор Apple TV+ болон Опратай хамтарсан цуврал баримтат кинон дээр ажиллаж байгаа аж.
Дашрамд дурдахад, хос хоёр өнгөрсөн жилийн нэгдүгээр сард язгууртны хэргэм зэргээ орхих шийдвэрт хүрснээ олон нийтэд зарласан бөгөөд Букингемийн ордон удалгүй тэдэнд үзүүлдэг байсан санхүүгийн дэмжлэгээ зогсоосон гэдгийг Опрагийн шоунд оролцохдоо ярьжээ. Энэ нь тэднийг контентын салбарт хөл тавихад нөлөөлсөн гэдгийг ч дурджээ.
Эх сурвалж: CNN, Bustle