Бизнес эрхлэгч №1
Намайг Борын Дуламханд гэдэг. СУИС-ын Дүрслэх Урлагийн Сургуулийн Уран зургийн ангийг 1997 онд нийгмийн хүнд үед төгссөн, зураачдын ажил ховор хүссэн чиглэлээрээ ажиллах боломжгүй байсан тул хэдэн жил бурхны зураг дагнан зурж ажилласан. 2000-аад оны эхэн, 90 оны сүүлээр хэд хэдэн хийдүүд хөдөө орон нутагт зэрэг баригдаж зураач бидэнд ажиллах боломж олдсон юм. 2003 оноос арьсан дээрх зургаа эхлүүлэн “Монгол ахуй” сэдвээр жуулчдад зориулж 9*12 см жаазтай гарган бэлэг дурсгалын лангуугаар борлуулсан, тэгсэн жуулчид биш манай хэрэглэгчид сонирхон худалдан авч урам өгснөөр одоо хийж байгаа бэлэг дурсгалын жижиг дунд бизнесээ эхэлсэн түүхтэй. Хямд жижиг хэмжээтэй арьсан зураг өдөрт олон ширхгээр зарагдаж харин би захиалгаа гүйцдэггүй байлаа. Нэг туслах зураачтай, суурь өнгө, хар зургийг гаргаад өгөхөөр нь би жижиг деталь нэг бүрийг гараар зурж хоёулаа шөнжин ажиллана.
Харин одоо цаг үеэ даган хөгжөөд UV хэвлэлийн машинтай болсноор эхний суурь дэвсгэр зургаа хар өнгөөр хэвлэж түүн дээрээ давхарлан зурж цаг, зардал, хөдөлмөр хэмнэдэг болсон. Энэ хэвлэлийн машинаа би “Инвес Кор” ББСБ-ийн зээлээр авсан амжилттай хөрөнгө оруулалт минь, 90*60 см хэмжээтэй хэвлэнэ. И-мэйл ч явуулдаггүй техникийн биш хүн эхэндээ хэвлэлийн машиныхаа учрыг олохгүй будилдаг байснаа бодвол өнөөдөр мастер болон хүмүүст зөвлөгөө өгөөд зогсож байна.
Үндэсний онцлогийг тусгасан, бэлэг дурсгалын арьсан дээрх зураг минь дэлхийн өнцөг булан бүрд айлын хананд өлгөөтэй байдаг.
Арьсан дээр зурж модон жаазанд татан үдэх хийц нь үндэсний онцлогоо шингээж байгаа нэг хэлбэр юм. Цаг зав гарахаар жуулчдад зориулсан зургуудаа зурж эхэлдэг, олон жил хийсэн болохоор тогтмол захиалагчтай болсон. Одоогийн байдлаар нийт 60 гаруй төрлийн өөр зурагтай, үүний дотор байгалийн үзэсгэлэнт газар, ан амьтан, таван хошуу мал, Монгол ахуй, баатрууд гэх мэтээр төрөлжсөн, мөн захиалгын дагуу зурсан зургууд сэдвүүдийг минь улам баяжуулж өгдөг. Өнгөрсөн жил олон сумын 100-н жилийн ойн болж нутаг нутгийн “Шүтээн хайрхан” шинэ сэдэвтэй болоод байна. Манай бүтээгдэхүүний онцлог нь зургийн сэдвээ нэмж хүн бүрийн сэтгэлд орших нандин дурсамжийг сэргээх юм. Бид арилжааны зориулалттай бүтээгдэхүүн хийгээд байгаа хэрэг огт биш эх орныхоо ахуйн онцлог, Монгол зургийн хэв маягийг дэлхийд сурталчилж байгаа гэж би бодож явдаг. Энэ жил ирэх сая жуулчинд зориулж эх орноо сайхнаар сурталчлах сайхан сэдэвтэй зургуудаа гаргахаар ажиллаж байна.
