Сэтгүүл зүйн Инновац Хөгжлийн Үүр төв НҮТББ-ын дэргэдэх Монголын баримт шалгах төв олон нийтийн санхүүжилтээр орлогын загвараа төрөлжүүлэх Гишүүнчлэлийн хөтөлбөрөө эхлүүлж байна.
Хуурамч мэдээллийг бууруулж, нийгэмд мэдээллээр манипуляц хийж буй үзэгдэл цахим орчинд түгээмэл байгаа эна үед учир шалтгааныг ойлгодог, түүнд автдаггүй хэрсүү хэрэглэгчдийг илүү олон болгох зорилготой энэхүү хөтөлбөр нь олон нийтээс хоёр төрлийн дэмжлэг хүсэж, хамтран ажиллахыг уриалж буй юм.
Нэгдүгээрт нийгэмд хор хөнөөлтэй хуурамч мэдээлэл, хэт нэг талын үзэл суртлыг бохир аргаар түгээх, “тархи угаах” санаархал зэргийг соргогоор мэдэрч, бусдадаа хэлж анхааруулах хэрсүү хэрэглэгчдийн мэдээллийг хүлээн авч, баримтаар шалгасан бодит үнэнийг түгээн дэлгэрүүлэх зорилгоор дэмжигчдийн хүрээллийг бий болгох нь нэн чухал гэж үзэж байна. Энхүү хүрээлэл нь аливаа худал хуурмагийн эсрэг баримттай, бодит мэдээллийг түгээх замаар баталгаатай, найдвартай эх сурвалжуудыг нэмэгдүүлж, олон нийтэд таниулахад хувь нэмрээ оруулах юм.
Хуурамч мэдээллээр бужигнуулж буй нийгмийн үзэгдлүүдийн урт хугацааны хор нөлөө нь хүн хоорондын итгэлийг алдагдуулан, ёс суртахууны доройтолд хүргэж байгааг хөндөж, үүний эсрэг илүү их нөөцөөр, өргөн хүрээгээр судалж, олон нийтэд мэдлэг, мэдээлэл түгээх нь чухал байна.
Хамтын ажиллагааны хоёр дахь хэлбэр нь нэгэн зорилгын төлөө нэгдэх олон нийтийн санхүүжилтийн загвар юм. Иргэдийн гишүүнчлэлд Хэрсүү болон Цэцэн гишүүн болох хоёр төрөл бий. Хараат бус, ил тод, баримтад тулгуурласан бодит үнэн мэдээллийг түгээх үйл ажиллагаанд санхүүгийн дэмжлэг үзүүлэх бол Хэрсүү гишүүн жилийн 120 мянган төгрөг, Цэцэн гишүүн нь жилийн 240 мянган төгрөг юм байна. Ингэж гишүүн болсноор хэрсүү гишүүдийн хүрээлэлд орж, жил бүр баримт шалгах үйл ажиллагааны тайлангаас өөрийнхөө өгсөн хандив дэмжлэгийн үр шимээр хичнээн хуурамч мэдээллийг залруулж, олон нийтэд ямар эерэг нөлөөлөл үзүүлснийг харах боломжтой юм. Мөн баримт шалгалтын сургалтуудыг үнэ төлбөргүй авч, зөвхөн дэмжигч гишүүдэд зориулсан мерч бүтээгдэхүүн хүлээн авна. Цаашлаад энэхүү хүрээллийг хамруулсан уулзалтуудад урилгаар оролцох, санал, зөвлөмжөө хүссэн үедээ өгч, хэрэгжсэн тохиолдолд үр нөлөөг хэмжүүлэх зэрэг өгөөж хүртэх юм.
Та энд дарж Гишүүнчлэлийн хөтөлбөрт нэгдээрэй.
