Лхагва гарагт явагдсан Премьер лигийн 30-р тойрогт “Манчестер Сити” клуб талбайдаа “Лейстер Сити”-тэй хүч сорьж 2:0-ээр буулгаж авав.
Тоглолт эхлээд дөнгөж хоёр дахь минутад Жак Греалиш гоолдсон. Тэрбээр 2023 оны 12-р сарын 16-ны өдрөөс хойш Премьер лигт гоолдоогүй байсан таагүй цувралаа эцэслэсэн нь энэ.
Греалиш гоолын баяраа 25 жилийн өмнө нас барсан дүүдээ зориулсан гэв. Тэрбээр “Дүү маань 25 жилийн өмнөх энэ өдөр нас барсан юм. Тиймээс жил бүрийн дөрөвдүгээр сарын энэ өдөр гэр бүлийнхний маань хувьд үргэлж л хэцүү байдаг. Өнөөдрийн тоглолтыг ээж, аав маань цэнгэлдэх хүрээлэнд ирж үзсэн. Дүүгийнхээ нас барсан өдрөөр гоол оруулсандаа бага ч гэсэн тайтгарлаа” гэсэн юм.
Дүү нь нас барах үедээ дөнгөж л есөн сартай нярай байсан. Харин Греалиш тэр үед дөрвөн настай байсан.
Тэрбээр 2021 онд “Астон Вилла” клубээс Манчестер хотын баг руу 100 сая фунтийн үнээр буурь сэлгэсэн билээ. Гэвч тэр цагаас өдийг хүртэлх хугацаанд “Сити”-гийн өмнөөс бүх тэмцээний хүрээнд 17 гоол л оруулсан.
Греалиш “Би нэг улиралд ихдээ л найман гоол оруулж байсан. Хэдийгээр үүнээс олон гоол оруулж чадах боловч, багийнхандаа гоол оруулахаас илүү чухал зүйлсээр туслахыг хүсдэг. Үнэндээ би хэзээ ч тийм олон гоол оруулдаг тоглогч байгаагүй шүү дээ. Мэдээж гоол оруулах сайхан байлгүй яахав. Түүнтэй эн зэрэгцэх мэдрэмж байдаггүй. “Сити” намайг улирал тутам 20, эсвэл 30 гоол оруул гэж авчраагүй гэж боддог” гэж ярилаа.
“Манчестер Сити” клуб ирэх ням гарагт “Манчестер Юнайтед”-тай тоглоно.
