Жил бүрийн зургаадугаар сарын 13-нд дэлхий дахин Альбинизмыг таниулах олон улсын өдрийг тэмдэглэн өнгөрүүлдэг. Цагаан буга, сармагчин, могой гээд нэг талаас өвөрмөц гоо харагдав ч тэд бүгд генийн өөрчлөлтийн дүнд төрсөн. Альбинизм гэдэг нь арьс, үс, нүдний пигментэд меланин хэмээх будагч бодис дутагдсанаас үүдэн үүсдэг бөгөөд хүнд ч, амьтанд ч тохиолдоно. Ийм төрсөн амьтан байгалиасаа бусдаасаа дорой, дархлал багатай байдаг.
Дэлхий даяар эртнээс альбинос амьтан, хүмүүсийг ялгаварлан гадуурхах, хүчирхийлэх, амь насыг нь хохироох явдал их гардаг байснаас альбинизмыг таниулах шаардлага хурцаар тавигдсан байна. Бусдаасаа өөр өнгөтэй тул альбинос амьтад агнахад хялбар байдгаас зэрлэг байгальд амьдрахад хүндрэлтэй. Гэвч хүн төрөлхтөн тэднийг амьтдын хүрээлэнд арчлан тэжээж, өсгөж байна.
