Японы Киото мужийн Ужи хот бол дэлхийд алдартай матча буюу ногоон цайны эх нутаг билээ. Матча нь зөвхөн уух зүйл биш, Японы олон зуун жилийн уламжлалыг илтгэх соёлын үнэт өв юм. Гэвч сүүлийн жилүүдэд уг үнэ цэн арилжаа, аялал жуулчлал, маркетингийн шуурганд өртөж, уламжлалт хотод сүүдрээ унагааж эхэлжээ.
Ужи хотын жижиг үйлдвэрлэгчид уламжлалт арга барилаа хадгалан ажилладаг. Гэвч масс зах зээлд тохирсон хямд үнэтэй, их хэмжээгээр үйлдвэрлэсэн матчаны эрэлт улам бүр өсөж, жинхэнэ чанартай цайг гар аргаар урлах хүмүүсийн хөдөлмөр үнэ цэнгүй мэт болжээ. Үүний улмаас зарим фермүүд хаалгаа барьж, уламжлалт арга устан алга болох эрсдэл бий болсон байна.
Гэвч Ужи хотын иргэд, бизнес эрхлэгчид энэ нөхцөлд бууж өгсөнгүй. Тэд үйлдвэрлэлийн хэмжээг хязгаарлаж, жуулчдад матча цайны түүх, хэрэглээний ёс зүйг таниулах сургалт, аялал зохион байгуулж эхэлжээ. Тэдний зорилго бол матчаг арилжааны хямд бүтээгдэхүүн бус, соёлын өв, оюуны үнэт зүйл хэвээр нь үлдээх явдал юм.
Матча бол зүгээр нэг ногоон цай биш, Японы соёлын өв, гоо зүй, байгаль, улирлыг мэдрэх ухаан, бясалгал, гоо зүйг нэгтгэсэн нарийн бэлгэдэл юм.
