АНУ дахь Reuters агентлагийн сэтгүүлч Д.Дэлгэрзаяагийн бүтээл “Хүслийн хязгаар” (Herders at the Edge) баримтат кино Америкийн уур амьсгалын өөрчлөлтийн чиглэлээрх хамгийн том кино наадам Climate Film Festival-д дэлхийн өнцөг булан бүрээс ирүүлсэн 450 гаруй бүтээлээс шалгарч оролцох болжээ.
Монгол малчдын амьдралд уур амьсгалын өөрчлөлтийн үзүүлж буй нөлөөг харуулсан уг богино хэмжээний бүтээлд Б.Амарсайхан, Б.Жанцанноров, Л.Мөнхтуяа болон тэдний гэр бүлийн ахуй түүхийг баримтжуулан харуулжээ.
Кино бүтээлийн багт найруулагч Д.Дэлгэрзаяа болон зураглаач З.Содбилэг, эвлүүлэгч Б.Амартүвшин, хөгжмийн зохиолч А.Хаш-Эрдэнэ, туслах зураглаач Б.Шинэгэрэл, дууны инженер Г.Батмөнх, өнгө тавигч Б.Ариунболд нар ажилласан байна.
Нью-Йорк хотод театрын дэлгэцнээ энэ есдүгээр сард гарах уг кино нь мөн 30-аас доош насны буюу Шилдэг залуу найруулагч төрөлд нэр дэвшээд байна.
Дашрамд, “Хүслийн хязгаар” баримтат киног медиа салбарын The Mediа Show 2024 арга хэмжээнд нээлтийн бүтээлээр урьж Улаанбаатарт толилуулж байв.
