Хөлбөмбөгийн дэлхийн аварга Ривалдо, Карлес Пуйол нарын тэргүүтэй “Барселона”-гийн хуучин тоглогчид 10-р сарын 4-ний өдөр Монгол улсад зочлохоор зэхэж байна.
“Subeedei Star Projects LLC” байгууллагаас нийтдээ 15 тоглогчийг эх орондоо авчирч, дотоодын хөлбөмбөгчидтэй нөхөрсөг тоглолтыг зохион байгуулахаар болжээ. Энэхүү тоглолт Төв цэнгэлдэх хүрээлэнд явагдана.
Ривалдогийн тухайд дэлхийн шилдэг хөлбөмбөгчинд олгодог БаллонДор шагналыг 1999 онд атгаж, 2002 оны ДАШТ-д түрүүлсэн.
Пеле 2004 онд түүнийг дэлхийн бүх цаг үеийн аугаа 100 тоглогчийн жагсаалтадаа нэрлэсэн байдаг. Тэрбээр “Барселона” багийн төлөө 130 гоолыг оруулж, тус клубийн бүх цаг үеийн шилдэг мэргэн буучдын наймдугаар байрт эрэмблэгдэж байна.
Харин Ялагдашгүй Армандагийн хамгаалалтын ноён нуруу Карлес Пуйолийг Месситэй мөр зэрэгцэн тоглож, Роналдуг хамгаалж байсан гэдгээр нь хөлбөмбөг сонирхогчид андахгүй биз ээ.
“Барселона”-гийн хуучин ахлагч тэрбээр Каталоны багийн өмсгөлтэй 593 тоглолтод оролцсон. Улмаар “Барселона”"-гийн төлөө хамгийн олон тоглосон хөлбөмбөгчдийн 6-рт эрэмблэгддэг юм. Түүний эрин үед “Барселона” багийнхан Аваргуудын лигт гурав, Ла лигт 6 удаа түрүүлж, нийт 18 цом өргөсөн билээ.
Пуйол Испанийн шигшээ багийн өмнөөс 100 тоглолтод оролцсон төдийгүй 2008, 2012 оны Европын АШТ, 2010 оны ДАШТ-д түрүүлсэн алтан амжилтынх нь нэг хэсэг байсан. Тэрбээр 2010 оны ДАШТ-ий хагас шигшээ тоглолтод Германы эсрэг ялалтын гоол оруулсан юм.
