Болгарын София хотноо наймдугаар сарын 27-ны өдөр хөшгөө нээсэн жүдо бөхийн өсвөрийн ДАШТ-д 71 орны 551 бөх хүч сорьж байна.
Тэмцээний гурав дахь өдөр эмэгтэйчүүдийн 57, 63 кг, эрэгтэйчүүдийн 73, 81 кг-ын жингийн барилдаанууд татамид явагдлаа.
Эмэгтэйчүүдийн 57 кг-д зодоглосон Машбатын Цэндбазар, Ганхуягийн Энхжин нар медалийн тавцанд хамтдаа гарсан.
М.Цэндбазар эхний тойрогт гоц мөргөж, Шведийн Ханна Бабулфат, Грекийн Данаи Димоу, Олон улсын жүдо бөхийн холбооны тамирчин Екатерина Жданова нарыг ялж “С” хэсгийг тэргүүлсэн юм. Ингэж хагас шигшээд Польшийн Магдалена Валегаг, финалд Японы Нонока Ямакава нарыг давж, дэлхийн аварга боллоо. Тэрбээр олимпын наадмын хүрэл, ДАШТ-ий хошой хүрэл медаль Г.Отгонцэцэгийн удирдлагад “Winner” дэвжээнээ бэлтгэл сургуулилалтаа базаадаг тамирчин юм.
Харин Г.Энхжингийн тухайд, мөн эхний тойрогт гоц мөргөж, Гүржийн Тинатин Гулбани, Польшийн Юлиа Сиемко, Туркийн Элиф Килич нарыг нарыг ялж, хагас шигшээд Нонока Ямакавад унасан.
Ингэж Г.Энхжин Олон улсын жүдо бөхийн холбооны тамирчин Екатерина Ждановаг давснаар, хүрэл медаль хүртсэн юм.
Энэ наадмын 57 кг-ын жинд монголчууд хоёр дахь жилдээ дараалан одтой наадав. Ноднин энэ жинд Тэрбишийн Ариунзаяа түрүүлсэн бол өнөөдөр М.Цэндбазар манлайлж, Г.Энхжин хүрэл медаль хүртсэн.
Монголын баг, тамирчид өсвөрийн ДАШТ-ийг одоогоор нэг алт, хоёр хүрэл медальтай үргэлжлүүлж байна. Тэмцээний сүүлчийн өдөр хүнд жингийн хүчтэнүүд барилдах юм.
