2 мин

Онцлох уран бүтээлч: "MorMor"

Г.Сүрэн 2021.05.06 2

MorMor хэмээх тайзны нэрээрээ танигдаад буй Сет Найкист нь 1992 онд Канадын Торонто хотод төржээ. Инди поп дуучин, дууны үг зохиогч, хөгжимчин нэгэн. MorMor нь шведээр "эмээ" гэсэн үг бөгөөд эмээдээ маш их хайртай, ойр дотно өссөн учраас гэгээн дурсгалд нь зориулан ийн нэрлэжээ. Торонтод их сургуульд социологиор суралцаж байсан ч эхний семестрээсээ л хөгжмийн ертөнцөд татагдан, сургуулиа орхин, төгөлдөр хуур тоглон, дуу зохиох болов. 

Түүнийг бид "Heaven's Only Wishful" дуугаар нь сайн мэдэх бөгөөд энэхүү дуу нь зөвхөн youtube сүлжээнд өнөөдрийг хүртэл 11 сая гаруй удаа тоглогджээ. 

Тэр 2015 онд анхны "Live for Nothing" дуугаа цацаж, 2018 онд өөрөө үгийг нь зохион, дуулсан 5 сингл бүхий "Heaven's Only Wishful" цомгоо гаргажээ. Уг цомогт багтсан "Whatever Comes to Mind" дуу нь Канадын шилдэг дууны үг зохиогчдод олгодог SOCAN шагналыг 2019 онд хүртсэн удаатай. 

"Чи дотроо юуг даван туулж байна? Юу ч санаанд чинь орлоо одоо хамаагүй. Өөрийгөө олтлоо чи түүнийхээ дундуур туучсаар байх болно" хэмээн дуулах түүний дуунууд гүн гүнзгий утга санаагаар өрнүүн баялаг байдаг. Дууны хөгжим нь эсрэг тэсрэгийн нийцэл гэмээр ер бусын тайтгарал авчирдаг тухай сонсогчид нь хуваалцдаг.

MorMor 2018 онд NPR сайтад өгсөн ярилцлагадаа "Амьдрал өөрөө бодит бус, хоёрдмол тул хөгжмөөрөө дамжуулан шулуун шударга илэрхийлэхийг хүсдэг" гэжээ. 

Түүнийг их сургуульд ороход нагац нь хуучин зөөврийн компьютерээ өгсөн бөгөөд түүгээр нь "GarageBand", "Logic" зэрэг хөгжмийн програмуудыг MorMor бие даан суржээ. 

"Өчигдөр шиг өөр нэг өдөр үргэлжилнэ. Илүү сайхан өдрийг би хүлээж байна. Гэвч үнэхээр үүнээс өөр өдөр бий гэж үү?" - MorMor

Г.Сүрэн 2021.05.06