Хятадад косплэй дүрд хувирснаасаа болж цагдаа нарт баривчлагджээ
Хятадын зүүн хэсэгт байрлах Жянсү мужид нэгэн охин кимоно өмсөж, косплэй дүрд хувирснаасаа болоод цагдаад баривчлагджээ. Тус охиныг зургаа даруулж байх үед цагдаа нар явж очсон байна.
Улаан цэцэг, ногоон навч бүхий цагаан кимоно өмсөн Япон ресторан, уушийн газрууд их байрладаг дүүргээр тус охин явж байсан байна.
8 сарын 14-нд Weibo гэх Хятадын маш өргөн хэрэглэгддэг олон нийтийн сүлжээн дээр тус охин болсон явдлаа хуваалцжээ.
Тэрээр "Summer Time Rendering" гэх япон анимэ, манганы дүрд хувиран шар үс зүүж, кимоно өмссөн байсан юм.
Сүүлийн үед Хятадад Японы эсрэг үзэл ихээхэн гарах болсон ба залуусын дунд идэвхтэйгээр тараад байсан япон соёлд дурлагчдын хувьд хэцүүхэн цаг үеийг туулах болжээ.
Тус бичлэгт "Хэрэв чи хятад хувцас өмсөж байсан бол би чамд ингэж хэлэхгүй. Гэхдээ чи хятад хүн байж кимоно өмссөн байна. Чи хятад хүн мөн биз дээ?" хэмээн цагдаагийн хэлж буй үг бичлэгт үлджээ.
Тэрээр 5 цаг гаруй саатуулагдаж, цагдаа нараас "ухаарлын үг" сонсож, 500 үгтэй уучлал эрсэн захидал бичжээ. Мөн "Миний хийсэн зүйл буруу гэж надаар бичүүлсэн. Гэхдээ би Япон, Европ, Хятад гээд бүх л соёлд дуртай. Би анимэ үзэж, бүхий л соёлыг сонирхон судлах мэдрэх дуртай. Яагаад ямар нэгэн зүйлд дуртай байх нь буруу гэж? Би хүссэнээ өмсөж, хүссэнээ хийх эрх чөлөөгүй бололтой" хэмээн бичсэн байна.