Өвөрхангай аймгийн Зүүнбаян-Улаан сумын малчин Д.Буянтогтохын гэр бүл 2020 оны тавдугаар сард осгосон бугийн элийг тэжээн өсгөж Борхүү хэмээн нэрийдэх болсон билээ. Борхүү өдгөө 3 нас хүрчээ.
Иймд "Өөрийгөө зэрлэг амьтан болон хүний хөл хөдөлгөөнөөс хамгаалах идэш тэжээлээ олж идэх чадвар тогтсон" гэх мэргэжлийн байгууллагын зөвлөмжийн дагуу түүнийг Богдхан ууланд авчрах шийдвэрийг гаргасан байна. Түүнийг Богдхан уулын Тайны аманд амьтан асран хамгаалах чиглэлээр үйл ажиллагаа явуулдаг “Мөнгөн эгшиг” ХХК-ны талбайд бэлчээрлүүлэх ба харин ирэх хавар Богдхан уулын дархан цаазат газрын Хамгаалалтын захиргааны хяналтад тус ууланд нутагшуулах юм.
Харин өнөө жил Борхүүг хүрээлэн буй орчиндоо дасган зохицох чадварт бага багаар суулгах зорилгоор түүнийг буга маллагч хариуцан хариулж бэлчээрлүүлэх идээшлүүлэх байдлаар ижил сүрэгт нь дасган оруулах ажээ.
