Хятадын Ханжоу хотноо Азийн спортын 19-р наадам 9-р сарын 19-нөөс 10-р сарын 08-ны өдрүүдэд зохион байгуулагдаж байна.
Боксын рингэнд өчигдөр Монголын таван тамирчин тулалдсан юм.
Өнөө жилийн ДАШТ-ээс мөнгөн медаль хүртээд буй Баатарсүхийн Чинзориг дэлхийн аварга Руслас Абдуллаевийг 5:0-ээр илүүрхэж, шигшээ наймд шалгарсан билээ. Тэд өнгөрсөн тавдугаар сард ДАШТ-ий финалд тулалдахад, Абдуллаев ялсан ч, энэ удаад Б.Чинзориг хариугаа авсан.
Улмаар Б.Чинзориг өчигдөр Азийн наадмын хүрэл медалийн төлөө Казахстаны Ертуган Жэйнуллиновтой тулалдав. Тэрбээр өрсөлдөгчөө 5:0-ээр илт илүүрхэж Азийн наадмаас хүрэл медалийн болзол хангалаа.
Ингэснээр Б.Чинзориг Монголын боксчдоос Азийн наадмын хос медальтай анхны тулаанч болж байна. Тэрбээр 2018 оны Азийн наадмаас мөнгөн медалийг хүртэж байсан билээ.
Б.Чинзориг өмнөх тулааны дараах ярилцлагадаа "Би энэ тэмцээнд түрүүлэх гэж ирсэн. Зорилгодоо хүрнэ" гэсэн. Тэгвэл зорилгынхоо эхний хэсгийг амжилттай биелүүлж, хүрэл медальд хүрээд байна.
Тэрбээр Азийн наадмын мөнгөн медаль болон олимпын эрхийн төлөөх тулаанаа 10-р сарын 3-ны 20:45 цагаас өнгөрсөн оны Азийн аварга Бунжонг Синсиритэй хийх юм.
Монголын боксчдоос О.Есүгэн "Ханжоу 2022" Азийн наадмаас хүрэл медаль хүртсэн. Харин бусад тулаанчдын хувьд, медальд хүрч чадалгүй тэмцээнээ өндөрлүүлсэн тул алтан медалийн эцсийн найдлага болж Б.Чинзориг үлдээд байна.
Сонирхуулахад, 2018 оны Азийн наадмаас Э.Цэндбаатар алтан медаль авч байсан билээ.
