Тейлор Свифтийн тоглолт Сингапурын эдийн засгийг 225 сая доллараар нэмэгдүүлжээ
Тейлор Свифт "Eras" аялан тоглолтоо гуравдугаар сарын 1-9-ний хооронд Сингапурт зургаан удаа хийлээ. Тэгвэл энэхүү тоглолт нь Сингапурын эдийн засагт 225-300 сая долларыг оруулсан гэх тооцоо гарчээ.
Энэхүү орлогын дийлэнх хувийг хөрш зэргэлдээх орнуудаас түүний тоглолтыг үзэхээр ирсэн жуулчдаас олсон аж. Тодруулбал, Тейлор Свифтийн тоглолтыг нийт 300 мянган хүн үзсэнээс 70 хувь нь хилийн чанадаас зорьж иржээ. Trip.com аялал жуулчлалын платформоос мэдээлснээр энэ үеэр Сингапурыг зорих нислэгийн тоо 186 хувиар, зочид буудлуудын захиалга тав дахин нэмэгдсэн гэнэ.
Тейлор Свифтийн тоглолтын үр дүнд Сингапурын энэ оны эхний улиралд ДНБ хоёр хувиар нэмэгдэж байгаа аж.
Эх сурвалж: Daily Mail