Б.Сэр-Од зургаан олимпод оролцох анхны марафончоор тодорлоо
Данийн Копенхаген хотноо тавдугаар сарын 5-нд явагдсан “Парис-2024” олимпын эрх олгох марафон гүйлтийн төрлөөрх сүүлийн тэмцээнд хурд сорьсон гавьяат тамирчин Б.Сэр-Од 2:19.25 цагийн амжилтаар 14 дүгээр байрт бариалсан юм.
Тэрбээр үүнээс гадна Хофугийн марафонд 2:10:11, Осакагийн марафонд 2:10:10 цаг гүйсэн амжилтаараа Олон улсын хөнгөн атлетикийн холбооны чансаагаар 80-р байрт жагсаж зургаа дахь олимпын наадамдаа оролцох эрхтэй болов.
Б.Сэр-Од ийнхүү марафон гүйлтийн төрлөөр хамгийн олон олимпод оролцсон гүйгч болж дэлхийн спортын түүхэнд нэгэн шинэ амжилтад хүрч байна. Тэрбээр 2003 оноос хойших хугацаанд Монгол улсаа төлөөлөн марафон гүйлтийн бүхий л томоохон тэмцээнүүдэд оролцож байгаа билээ. Энэ зууртаа 80 орчим олон улсын тэмцээнд хурд сориод байна. Харин "Парис-2024" олимпын зам мэргэжлийн тамирчны хувиар туулах түүний сүүлчийн зай байх болно.
Өдгөө 43 настай Б.Сэр-Одын хувьд, “Парис-2024” олимпын наадамд оролцох Монголын багийн 14 дэх эрхийн эзнээр тодорсон бөгөөд марафоны төрөлд уралдах гурав дахь монгол тамирчин болж байна. "Парис-2024" тэмцээний үеэр монголын марафончдоос Б.Мөнхзаяа гурав дахь олимпдоо уралдах бол Г.Хишигсайхан анх удаа олимпын замд гүйнэ.
Мөн тавдугаар сарын 12-ны өдөр Олон улсын хөнгөн атлетикийн холбооноос монголын мөн хоёр марафончийн эрхийг баталгаажуулж албан ёсоор зарлах юм.