Месси Америкийн лигийн тоглолтод ТАВАН гоолын дамжуулалт өгсөн анхны тоглогч боллоо
Ням гарагт явагдсан Америкийн лигийн тоглолтод "Интер Майами" клуб талбайдаа "Нью-Йорк Ред Буллс"-ийг хүлээн авч, 6:2-оор хожсон юм.
Луис Суарес эл тоглолтод хэттрик хийж, харин Лионел Месси нэг гоол оруулан, таван гоолын дамжуулалт өгснөөр хоёр дээд амжилтыг шинэчлэв.
Нэгдүгээрт, тэрбээр МЛС лигийн нэг тоглолтод таван гоолын дамжуулалт бүртгүүлсэн анхны тоглогч юм. Хоёрдугаарт, МЛС лигийн нэг тоглолтод зургаан гоолыг бүтээсэн анхны хөлбөмбөгчнөөр тодров.
Месси мөн Америкийн лигийн түүхэнд таван тоглолтын турш дараалан гоолдсон анхны тоглогч юм.
Харин Суарес энэ улирлын 11 дэх тоглолтодоо оролцож, арав дахь гоолоо оруулсан нь энэ. Тэрбээр Америкийн лигийн мэргэн буучдын жагсаалтыг Мессигийн хамтаар тэргүүлж байна.