1 мин

ОХУ-ын 6 удаагийн аварга Садулаев финалд даруулах шахав

М.Сугар-Эрдэнэ 2024.05.07

ОХУ-ын Одинцовод чөлөөт бөхийн ОХУ-ын АШТ болж өнгөрлөө. Олимпын өмнөх УАШТ гэдгээрээ олны анхаарлыг татаж, хэн нь Парист зодоглох вэ гэдгийг тодруулсан юм.

Эрэгтэй 97 кг жинд Абдулрашид Садулаев (Дагестан), Алихан Жабраилов (Дагестан) нар барилдаж, Орос Танк 8:4 ялсан. Гэхдээ эхний минутад Жабраилов аваргыг хүнд байдалд оруулан, бүхэл 4 оноо авсан юм. Садулаев ийм мэхэнд хэзээ хамгийн сүүлд оноо алдсаныг хэн ч санахгүй биз ээ. Гэхдээ Танк байдлыг гартаа авч, найман оноо дараалан авснаар зургаа дахь удаагаа улсын аварга боллоо.

97 кг

Хүрэл медалийн төлөө

Игорь Овсянников (Красноярск) – Сослан Жагаев (Алани) – 2:1

Бады-МаадырСамдан (Тыва) - Рамазан Шабанов (Дагестан) – 7:3

Тэмцээний дараа Садулаев олон нийтийн сүлжээнд “дахин барилдаж, үзэгч олноо баярлуулсандаа Бурханд баярлалаа гэж хэлмээр байна. УАШТ-д оролцож, түрүүлэх нь надад агаар ус мэт хэрэгтэй байлаа. Дотоодын өрсөлдөөн хаагдлаа. Учирсан бүх саад бэрхшээлийг даван туулахын тулд би өөрөөсөө хамаарах бүхнийг хийсэн. Гурав дахь олимпдоо оролцоно гэдэгтээ итгэсээр байна. Эрүүл саруул ухаан ялан дийлнэ гэдэгт найдаж байна.

Спортын ордныг дүүргэсэн үзэгчиддээ баярлалаа. Та нарын дэмжлэгээр улам өндөрт гарч чадах болно” гэж бичсэн байна.