2020 оны орон нутгийн сонгууль болоход ердөө 9 хоног үлдээд байна. Бид энэ сонгуулиар хоёр шатны Иргэдийн хурлын төлөөлөгчийг нэгэн зэрэг сонгох хариуцлагатай алхмыг хийнэ. Тодруулбал, нийслэлийн иргэд нийслэл болон дүүргийн төлөөлөгчөө, орон нутгийн иргэд аймаг, сумын төлөөлөгчөө сонгох юм. Улсын төсвөөс 16.6 тэрбум төгрөгийн зардал гаргаж, 18 мянга гаруй хүн сонгуулийн үйл ажиллагааг зохион байгуулахаар ажиллаж байна. Хамгийн гол нь, сонгогчдын ирц 50 хувьд хүрэхгүй байлаа ч сонгууль хүчинтэйд тооцогдох тул ирэх 4 жилд нийслэл, дүүрэг, аймаг, суманд бидний өмнөөс хэн шийдвэр гаргах вэ гэдгийг санал өгсөн иргэд л шийднэ. Иймээс орон нутгийн сонгуулийг хайхрахгүй өнгөрч болохгүй юм.
