2 мин

Зөвлөгөө: Олон ном зэрэг уншихад анхаарах зүйлс

У.Бямбаням 2020.01.10

Ном унших гэдэг талх идэх, өндөг шарах, хувцас угаах шиг ердийн тогтсон үйлдэл гэж үздэг хүмүүс бий. Хэрэв тийм байсан бол би энд юм бичих шаардлага гарахгүй байх сан. Гэвч номыг хэрхэн ойлгох, яаж унших, яаж сонгох, ямар үед унших гээд өөрийн мэдсэн сурснаас хэлэхэд тийм ч амар хялбар ажил биш ээ. Зөвхөн үсэг мэддэг, үе холбодог гээд уншчихна гэсэн үг биш бололтой. Тиймээс та бүхэндээ өөрийн “Dead Poets Society” булангаа хүргэж байхаар шийдлээ. Ном унших, сонгох, бас бус уран зохиолтой холбоотой “хөөрхөн” мэдээлэл хүргэж байя л гэсэн юм.

1. Яагаад олныг

Ажлын шаардлагаар унших ёстой, хичээлийн даалгаварт унших ёстой, таашаал эдэлж унших, танин мэдэхүйгээ хөгжүүлж унших гээд олон шаардлага гарч болно. Яг энэ шаардлагын дагуу номнуудаа сонго. Би жишээ нь оюутнууддаа хичээл заахад хэрэг болох ном. Эдгээр нь миний бичгийн ширээний хажуугийн тавиурт байнга байна. Өөрийн таашаалаар унших. Энэ бол буйдангийн арын түшлэг дээр голцуу байдаг. Танин мэдэхүй, түүх намтрын номнууд голцуу цүнхэнд явна. Хааяа авч хардаг ном голцуу байрандаа буюу номын санд байна. Тэгэхээр нэг нэгээр нь уншсанаас зэрэг унших нь цаг хожих үр дүнтэй арга.

2. Холих уу?

Зэрэг уншихаар холино гэсэн айдас хүмүүст бий. Үүнийг тойрохын тулд өөр өөр төрлийн ном сонгоод байгаа юм шүү дээ. Нэг удаа би “Карамазовын хөвгүүд”, “Анна Каренина” хоёрыг зэрэг уншаад эцэстээ бууж өгч билээ. Мэдээж бид компьютер биш учраас мартаж санах тохиол гарна шүү дээ.

3. Хаана унших вэ?

Ажлын номыг мэдээж цайны цагаараа, эсвэл гэртээ ажлын ширээнийхээ ойролцоо тавиад орой үдэш сууж ажиллах үеэрээ харж болно. Харин баримтат, түүх намтрын номыг цүнхлээд автобусанд, эсвэл хаа нэгтээ хэн нэгнийг хүлээхдээ уншиж болдог. Уран зохиолын номд анхаарал шаарддаг тул би голцуу буйдан дээрээ суугаад оройн цагаар уншдаг. Ийм байдлаар хаана, хэзээ уншихаа бодолцох хэрэгтэй.

4. Хаана байрлуулах вэ?

Хэрэв бид анзаарч харвал гэрт болон ажил дээрээ тогтмол суудаг, явдаг хэдэн газартай байдаг. Гэрт бол хоолны ширээ, буйдан, ажлын ширээ гэсэн газрууд бий. Тэгэхээр унших номнуудаа эдгээр байрлалд тавиад уншиж болно. Гол нь нэг их цаг зарахгүй өдөрт, тус бүр нэг цагийн хугацаа зарцуулахад чи 3 цаг уншина гэсэн үг.