1 мин

Обамагийн дуртгал ном худалдаанд гарсан эхний өдрөө 887 мянган хувь борлогджээ

Б.Саруул 2020.11.19 1

6

АНУ-ын Ерөнхийлөгч асан Барак Обамагийн A Promised Land хэмээх дуртгал ном худалдаанд гарсан даруйдаа өндөр борлуулалттай номын жагсаалтад багтлаа. Penguin Random House хэвлэлийн компаниас мэдээлснээр урьдчилсан захиалга, АНУ, Канад дахь эхний өдрийн борлуулалт нийлээд 887 мянган хувь борлогдсон гэжээ. 

Түүнчлэн Обамагийн дуртгал тус хэвлэлийн компанийн түүхэнд нээлтээ хийсэн эхний өдөр хамгийн олон хувь борлогдсон ном болжээ. 

Barnes & Noble компанийн гүйцэтгэх захирал Жеймс Даунт оны эхээр Publishers Weekly сэтгүүлд өгсөн ярилцлагадаа "Энэ ном онцгой амжилт үзүүлэх болно. 2007 оны долоодугаар сарын 21-ний өдрөөс хойш гарсан хамгийн их борлуулалттай ном байх болов уу" хэмээн ярьж байсан юм. 

2007 оны долоодугаар сард зохиолч Жоанна Роулингийн "Харри Поттер ба Үхлийн шүтээн" хэвлэлтээс гарч, эхний өдрөө 8.3 сая хувь зарагдаж байсан билээ.

Дашрамд дурдахад, 768 хуудас бүхий A Promised Land  ном  25 хэл дээр нэгэн зэрэг хэвлэгдэн гарч буйгаараа онцлог юм. Хэвлэмэл хувилбар нь 45 доллар, дижитал хувилбар 17.99 доллар, аудио хувилбар 40 доллар, татаж авах боломжтой аудио хувилбар 65 доллараар уншигч, сонсогчдод хүрч байгаа аж. 

Эх сурвалж: CNN

Б.Саруул 2020.11.19

6