МАН-ын шинээр бүрэлдсэн Бага хурлын анхдугаар хуралдаан урьд шөнө болж, нийт гишүүдийн 74.5 хувийн саналаар Д.Амарбаясгаланг ерөнхий нарийн бичгийн даргаар улираан сонголоо. МАН-ын дарга хамтран ажиллах ерөнхий нарийн бичгийн даргаа Бага хуралд санал болгодог дүрмээр У.Хүрэлсүх Д.Амарбаясгалангийн нэрийг дэвшүүлсэн бол танхимаас Б.Баярмагнай өрсөлдсжээ.
МАН-ын ерөнхий нарийн бичгийн дарга Д.Амарбаясгаланг "У.Хүрэлсүхийн хүн" гэдэг. Тэрбээр МАХН-ын Хэвлэл мэдээллийн хэлтсийн даргаас улс төрийн карьераа эхэлж, 2008 оноос НИТХ-ын тэргүүлэгч, НИТХ дахь МАН-ын бүлгийн дарга, 2013 онд Зүүний хүчний холбооны холбооны Удирдах зөвлөлийн гишүүн, 2010 онд НАМЗХ-ны дэд ерөнхийлөгчөөр сонгогдон ажилласан. 2016 оны арванхоёрдугаар сард МАН-ын ерөнхий нарийн бичгийн даргаар анх удаа сонгогдож, одоо хоёр дахь удаагаа улиран сонгогдлоо. Түүнийг залуу хүн гэхэд хийгүй, няхуур хүн гэдэг. Улс төрд орсон цагаасаа хичээл зүтгэлтэй, ачаалал даах тэвчээртэй байдлаараа У.Хүрэлсүхийн анхаарлыг татсан гэлцдэг.
Д.Амарбаясгалан ШУТИС-ийн Холбоо мэдээлэл технологийн сургуулийг инженер, МУИС-ийн Нийгмийн шинжлэх ухааны сургуулийг улс төр судлаач мэргэжлээр дүүргэсэн байна.
Тэрбээр эхнэр, хүүхдүүдийн хамт амьдардаг.
