Нидерландын шигшээ баг болон “Арсенал”, “Манчестер Юнайтед” клубүүдэд замналынхаа гялалзсан он жилүүдийг өнгөрүүлсэн Робин ван Перси хөлбөмбөгийн дасгалжуулагч болж, өдгөө “Херенвен” клубийг удирдаж байгаа билээ.
Тэрбээр бямба гарагт тус клубийг удирдан дөрөв дэх тоглолтодоо оролцсон ч, том хожигдол хүлээлээ.
Тоглолтын 4дэх минутад “АЗ Алкмаар”-ын тоглогч Свен Мижнанс тооны харьцага нээсэн ч, “Херенвен”-ээс Луук Брауверс 19 дэх минутад тоглолтыг тэнцүүлсэн юм.
Гэвч энэ мөчөөс эхлэн тоглолтын хувь заяа бүхэлдээ “АЗ Алкмаар”-ын тал руу эргэсэн. Учир нь “Тоттенхэм” клубт тоглож байсан 22 настай Трой Парротт удаах дөрвөн гоолыг оруулав.
Улмаар тоглолтын сүүлчийн 20 минутад нэмж дөрвөн гоолыг хаалгандаа алдсан “Херенвен” 9:1 харьцаатай ялагдлаа.
Харин тэдний өрсөлдөгч “АЗ Алкмаар”-ийн хувьд, түүхэн дэх хамгийн том хожлоо тунхагласан нь энэ.
Ван Перси “Херенвен”-ийг удирдсан эхний дөрвөн тоглолтодоо ердөө ганцхан хожиж, одоогоор дөрвөн оноотойгоор лигийнхээ 12-р байрт бичигдэж байна.
Ван Перси “Арсенал"-д тоглож байх үедээ “Манчестер Юнайтед” клубт 8:2-оор хожигдож байсан бол дасгалжуулагчийн хувиарх хамгийн том ялагдлаа хүлээсэн нь энэ байлаа.
Хөлбөмбөгийн түүхэн дэх агуу дасгалжуулагчид болох Алекс Фергусон болон Арсен Венгер нарын удирдлагад суралцсан Ван Персигийн шинэ ажлын эхлэл харин тийм ч сайнгүй байна.
