Дэнни Де Вито 1944 оны 11 дүгээр сарын 17-нд Нью-Жерсид итали-албани гэр бүлд төржээ. Түүний эцэг жижиг бизнес эрхлэгч бөгөөд хүүхдүүдээ католик болгон хүмүүжүүлсэн юм.
Дэнни багадаа эгчийнхээ гоо сайхны салонд ажиллаж байгаад Америкийн драмын урлагийн академид элсжээ.
1966 онд сургуулиа жүжигчний мэргэжлээр төгсөж, жижиг театруудад тоглодог болсон байна. Кино урлагийн анхны бүтээл нь 1970 оны “Хэврэг мөрөөдлүүд” кино байлаа.
Цаашдаа Де Вито дэлхийн кино урлагийн шилдэг бүтээлүүдэд дүр бүтээж, арваад киноны найруулагчаар ажиллаж, продюсерийн ажил хажуугаар нь хийдэг болсон.
149 см намхан нуруутай ч тэр жижигхэн бие нь цул авьяас гэж түүний талаар ярьдаг байлаа.
Де Вито жүжигчин Рее Перлмантай гэрлэж, гурван хүүхэдтэй болсон. 2017 онд тэд салсан ч гэр бүлээ цуцлуулаагүй юм.
