Энэ сард Бахрайны Манама хотноо болсон хүндийн өргөлтийн дэлхийн аварга шалгаруулах тэмцээнээс огцом өргөлтийн төрөлд 116 кг-ыг амжилттай татаж, мөнгөн медаль хүртсэн гавьяат тамирчин Мөнхжанцангийн Анхцэцэг их спортоос зодог тайлж буйгаа зарлалаа.
Тэрээр “Mongol TV”-д ярилцлага өгөх үеэрээ “Өнөө жилийн ДАШТ бол миний оролцсон олон улсын сүүлчийн тэмцээн байлаа. Би 17 жил хүндийн өргөлтөөр хичээллэхдээ асар их цаг хугацаа, эрүүл мэнд, амьдралаа, боломжуудаа золиосолсон. Эрүүл мэндээ бодох цаг маань болсон байна. Өнөө жил зодог тайлна гэдгээ шийдчихээд байсан учир “Парис-2024” олимпын наадам, сая оролцсон ДАШТ илүү чухал, заавал медаль авах ёстой тэмцээн шиг санагдсан. Мэдрэмжүүд нь өөр байдаг юм билээ. Зарим зүйлд хоргодоод л, тэмцээний заалнаас холдож явмааргүй санагдах ч юм уу, хүндийн өргөлтөдөө зүүгдэх мэдрэмж төрж байсан. Надад бэртээж байгаагүй, бүрэн эрүүл нэг ширхэг ч үе үлдээгүй. Тохой, өвдөг, мөр, шагай, нуруу гээд л. Сүүлийн хоёр жилийн хугацаанд асар хүчтэй стероид тариаг төвөнх рүүгээ долоо хоногт нэг удаа юм уу, сард хоёр удаа хийлгэсэн. Үнэхээр хүнд спорт шүү дээ. Эмэгтэй хүний хувьд 17 жилийн хугацааг энэ спортод зориулахдаа өөрийнхөө хувьд харамсахааргүй, сайхан өрсөлдлөө. Цаашид ар гэртээ анхаарна, нөхрөө дэмжинэ. Хүүхэд байхдаа аав, ээжтэйгээ нэг ч удаа зугаалганд явж, хүүхэд насны сайхныг бүрэн дүүрэн мэдэрч байсангүй. Одоо сайхан амьдарч үзмээр санагдаж байна” хэмээн ярьсан юм.
Тэрээр ДАШТ-ээс алт, хошой мөнгө, хүрэл гээд нийт таван медаль хүртсэн билээ.
