Медиа мэдээллийн Journalism.co.uk сайтаас жил бүр сэтгүүл зүйн хөгжлийн чиг хандлагыг салбарын мэргэжилтнүүдээс асуун тодорхойлдог. Тэгвэл 2025 оныг тэд юу гэж тодорхойлсон бэ гэдгийг орчуулан хүргэж байна.
Хэрэглэгчтэй тогтоох эргэх холбоо, итгэлцэл, харилцан ярианы тухай сүүлийн жилүүдэд идэвхтэй ярьж байгаа ч, энэ онд урьд урьдынхаас илүү гол асуудал болох нь ээ. Түүнчлэн хандалт гэдэг ердөө зочилсон хүний тоо бус утга учиртай холбоо тогтоох нь чухал гэдгийг дараах таван мэргэжилтэн онцолж байна.
Уншигчийнхаа хэрэгцээг мэдэрч чадвал орон нутгийн хэвлэлүүдэд орон зай байна
Майкл МакЛиод
“The Edinburgh Minute”, “The London Minute” хэвлэлийн үүсгэн байгуулагч
Хэвлэн нийтлэгчид бидний хувьд хэрэглэгчидтэйгээ илүү утга учиртай эргэх холбоо тогтоож чадахгүй байх аваас зарим ажлын байр, албан тушаалыг цомхотгохоос аргагүй болно.
Зөвхөн сая, сая хандалтад тулгуурлаж ажилладаг орчин цагийн мэдээллийн урсгал нь орон нутгийн хэвлэл мэдээллийн хувьд “шийтгэл” мэт тогтолцоо билээ. Зөвхөн илүү хандалт авахын төлөө мэдээ бэлтгэх нь уншигчдад хамгийн их хамаатай орон нутгийн мэдээллийг орхигдуулж, зар сурталчилгаа, сенсаци хөөсөн мэдээний урсгалыг л тэтгэж байна.
Гэвч жинхэнэ уншигчид, мэдээнд дурлагсад үүнээс илүү ихийг хүртэх эрхтэй. Тийм учраас редакцууд уншигчдадаа илүү хүндэтгэлтэй хандах ёстой.
Энэ ч утгаараа би өнгөрсөн жил “Community Noticeboard” гэх хэсэг “Edingburgh Minute” өдөр тутмын и-мейл товхимолдоо нэмж Google Form-оор дамжуулан уншигчдаасаа мэдээлэл хүлээн авч эхлээд байна. Бидэнтэй өдөр бүр 5-10 хүн холбогдож байна, заримдаа 20 хүрэх нь ч бий. Үүний дараа бид мэдээллийг баталгаажуулж, эх сурвалжтай холбоо тогтоодог. Энэ ажил маань надад маш их урам зориг өгч, ямар гайхалтай хүмүүсийн түүх, ямар элбэг байдаг юм бэ гэж бодоход хүргэсэн.
Хэвлэл мэдээлэлд итгэх уншигчдын итгэл хамгийн доод түвшиндээ хүрээд байгааг бид бүгд л ярих болсон. Харин дээрх санаачилгыг гаргаснаасаа хойш би энэ нөхцөл байдлыг өөрчлөх боломжтой юм байна гэж бодох болов. Энэ бол хэн хэндээ итгэх итгэлцлийн үр дүн. Яг ийм аргыг би “London Minute”-д бас хэрэгжүүлж эхэлсэн нь “Edinburgh Minute”-ээс ч илүү хурдтайгаар өргөн хүрээг хамарч байна. Товхимлын маань уншигчдын тоо хоёр хэвлэмэл сонины уншигчдын тооноос ч илүү болоод байна.
“Хүн бүрд хариу өгөх” гэсэн миний зарчим аливаа редакцын төлөвшил, уншигчийнхаа төлөөх тууштай байдлыг шаарддаг. Уншигчгүй бол бид хэн ч биш шүү дээ. Уншигчид мэдээний гарчгийг хараад л тухайн мэдээ өөрт нь хамаагүй гэдгийг ялгаж чадна. Уншигчийнхаа хэрэгцээг хангаж, эргэх холбоо тогтооно гэдэг вэбдээ сэтгэгдэл хэсэг нэмээд л болчихдог юм биш. Харин илүү шинэлэг арга замыг сэдэж олох нь итгэлцлийг нэмэхэд хамгийн чухал.
Хэрэглэгч эн тэргүүнд
Мария Бреслин
“The Liverpool Echo” сэтгүүлийн редактор
2024 он бол “Liverpool Echo” зэрэг орон нутгийн брэнд хэвлэлүүд өөрийн дуу хоолойг дахин олсон, үүний үр дүнд ирэх жил ч дуу хоолой нь илүү тод байх нь гарцаагүй он байлаа. Их Британийн гудамжинд болсон үймээн шуугианаас эхлээд Ливерпүүлийн асрамжийн газрыг авч үлдэх хөдөлгөөн, Салфордын домогт хөвгүүдийн клубийн төлөөх зүтгэл гээд өнгөрсөн 12 сарын хугацаа бидэнд эргэн тойрны минь амьдрал, үйл явдлыг мэдээлэх сэтгүүл зүй яагаад чухал, яагаад үүний төлөө тэмцэх ёстой вэ гэдгийг харууллаа.
Бид хэрэглэгч түрүүнд гэсэн үзэл хандлагыг дэлгэрүүлж, датад суурилан уншигчдынхаа хэрэгцээнд анхаарал хандуулах, тэдний тухай илүү ихийг олж мэдэх, мөн сайтдаа хандах шалтгааныг нь ойлгож, шинэ хэрэглэгчдийг ч контентдоо татахыг эрмэлзэх нь чухал. Бид үүнийг хүргэж буй мэдээлэл болон хүргэх арга хэлбэрээ ямагт сайжруулах боломж гэж харан, бүтээлч байдлаа зогсолтгүй “зүлгүүрдэх” шаардлагатай.
Мэдээж үүний тулд хиймэл оюунтай “нөхөрлөж”, технологийг өөрт хэрэгтэй байдлаар ашиглахад анхаарах ёстой. Технологийн аваргуудын үргэлж шинэчилж байдаг алгоритмын өөрчлөлтөд нийцэх гэж нойроо алдахын оронд удирдаж чадах бүхэндээ хоёр дахин илүү эрч хүч зарцуулах нь үр дүнтэй.
Хэрэглэгчийн хариу үйлдэл гэх лайк, шейрийн тоог март. Итгэлцэл бол ирээдүй
Мили Сэмлани
“Splice Media” компанийн Олон нийтийн харилцааны менежер
Бидний амьдарч буй эрин үе “тархины ялзрал” гэх үгээр тодорхойлогдож, хүмүүс мэдээнээс зугтаж байхад мэдээллийг зөвхөн дамжуулдаг уламжлалт медиа хандлага хоцрогдож байна. Өнөөгийн хүлээн авагчид идэвхгүй хүлээн авагчид биш ажээ. Тэд медиагаас мэдээ, мэдээллээс илүүг хүсэж байна. Хүлээн авагчид өөрийг нь сонсдог, үнэ цэнийг нь үнэлдэг, гүйлгээд өнгөрөх төдий бус үр ашигтай мэдээлэл өгдөг медиаг хайж байна.
Контент бол хаан гэх ойлголт өөрчлөгдөх зууртаа бидэнд сэтгүүл зүй бол хамтач, хүн төвтэй харилцааны экосистем гэх шинэ хандлагыг ойлгуулж байна. Хэвлэл мэдээллийн байгууллагын хувьд энэ нь хүлээн авагчидтай харилцах байдлаа үндсээр нь шинээр тодорхойлох шаардлагыг бий болгов.
Хэрэглэгчид редакцтай илүү ойр дотно харилцаа үүсгэж, утга учрыг хамтдаа бүтээлцэж, дуу хоолой, үзэл хандлага нь тусгагдсан эсэхэд илүү ач холбогдол өгөх болжээ. Хамтдаа өсөн хөгждөг, өөрчлөгдөн дэвшдэг, эргэх холбоотой хүрээллийг бий болгох нь дээр дурдсан мэдээллээс ч илүү чухал зүйл юм. Мэдээж үүнийг бий болгоход газар зүй, нийгмийн хүрээллийн ямар ч хязгаарыг давах боломж өгдөг технологийн хөгжлийг ашиглах нь зүйтэй.
Бид контент бүтээгчээс харилцаа өрнүүлэгч болж өөрчлөгдөх ёстой. Хүнд утга учир өгдөг үнэнч харилцааг бий болгох. Ингэж харвал сэтгүүл зүй зөвхөн мэдээ, контент гэх бүтээгдэхүүний тухай биш харин мэдээ, мэдээллийг хамтдаа бүтээдэг, оролцогч бүр бүтээгч, бас хүртэгч байдаг эргэх холбоотой харилцаа юм.
Сэтгүүл зүй оршин тогтнох эсэх нь итгэлцэл төрүүлж чадах, утга учиртай холбоо тогтоож чадахаас хамаарна. Учир нь медиагийн ирээдүй бол контент бүтээх биш харилцаа өрнүүлэх болжээ. Энэ харилцаа зөвхөн лайк, үзэлтийн тоонд суурилж биш итгэлцэл, үзэл санааны нэгдэл, хамтын үйл хэрэгт тулгуурлаж бий болно.
Хариу үйлдэл гэх лайк, шейрийн араас хөөцөлдөх биш, итгэлцэлд суурилсан утга учиртай харилцаа ирээдүйг тодорхойлно.
Хайлтын систем ба сошиал медиа хандалтад нөлөөлөхгүй
Томас Баекдал
Хэвлэл мэдээллийн зөвлөх
Сошиал медиагаар дамжих мэдээний хандалт буурч, энэ урсгалыг хянахад улам л хэцүү болох нь ээ. Гэхдээ бидэнд тулгарч буй асуудал нь хандалтын буурах төдий бус харин хандалт яаж ирдэг вэ гэх мөн чанарын асуудал юм. Учир нь, хүмүүс сошиал медиагаас залхаж байна. Хэдийгээр хэрэглээ нь өндөр хэвээр байгаа ч, хэрэглэгчид ямар ч линкэн дээр дарахаа больжээ. Заримдаа дарж орлоо ч хариу үйлдэл үзүүлэх нь эрс багассан байна.
Ингээд зогсохгүй, Instagram, TikTok дээр оруулсан холбоосны ач холбогдол, эрэмбийг платформ өөрөө хязгаарлаж, бууруулчхаж байгаа тул медиад тэндээс хандалт нь ирэх нь багасав. Платформын хувьд маркетинг, олны анхаарлыг татах гэхчлэн хэвлэн нийтлэгчдэд хандалт авчрахааргүй зүйлс илүү чухал.
Хайлтын системүүд маргаан дагуулсан бас нэгэн асуудал болоод байна. Бусад платформын адил тэд өөрсдийн тэргүүнд эрэмбэлсэн асуудлаа л дээгүүр гаргахаас биш хэвлэн нийтлэгчдийг хайлтын илэрцийн дээгүүрт гаргана гэж үгүй. Энэ утгаараа сонин, мэдээ, мэдээллийн хандалт хайлтын системээс ч бас нэг их орж ирэхгүй.
Түүнчлэн хайлтын систем дэх хиймэл оюуны нөлөө үүнд улам нэмэгдэнэ. Ингэснээр медиа дотроо хуваагдал, туйлшрал бий болох нь ээ. Хиймэл оюуны “дуртай”, эсвэл хамтран ажилладаг хэвлэн нийтлэгчид нь л хандалт авч, бусад нь дор үлдэх төлөвтэй байна.
Уншигчдынхаа хүсэл, сонирхлыг нарийн мэдрэх нь анхаарал татах шинэ арга
Наоми Овусу
“Tickaroo” компанийн үүсгэн байгуулагч
Хүмүүс гар утсаараа хаа дуртай газраасаа лайв контентууд, спорт дамжуулалтууд үзэх болсон тул гар утасны хэрэглээ өссөөр байх нь ээ. Гэхдээ хүмүүс сошиал медиа хэрэглээгээ хянах, зохицуулах болсон тул олон нийтийн сүлжээний аливаа сонордуулгаа хаах, хэрэглэх цагаа бусад апп ашиглан хязгаарлах болж байна. Тэгэхээр гар утас гэдэг хүний амин чухал хувийн хэрэглээ болсон энэ цаг үед контент ч бас хувь хүний онцлогт тохирсон, нарийн шинж чанартай байх шаардлагатай болж байна.
2025 онд анхаарал татахуйц, “гял цал” гарчиг бус хүлээн авагчийн сонирхолд нийцсэн, хувь хүнд нь хамааралтай гарчиг өгөх нь чухал болж байна. Хүмүүс мэдээнээс зугтах болсон цаг үед хэрэглэгчдийн хувьд утга учиртай, үнэ цэнтэй, хүсэл сонирхолд нь тулгуурласан контент л хэрэгтэй. Энэ утгаараа спортын контент нь хүмүүс үздэг, дэмждэг баг, тоглогчдоор нь дамжуулж холбоо тогтоох боломжтой хамгийн оновчтой арга байж мэдэх юм.
