Пүрэв гарагт Про лигийн 18-р тойргийн хүрээнд явагдсан “Аль-Раед” болон “Аль-Насср” багуудын тоглолтын үеэр Криштиано Роналду ээлжит удаагаа гялалзав.
Тэрбээр энэхүү тоглолтод гоол оруулж, гоолын дамжуулалт бүртгүүлснээр баг нь өрсөлдөгчөө 2:1 харьцаатайгаар буулган авч Про лигийн 3-р байр руу дэвшлээ.
Уг тоглолтын дараагаар 39 настай Криштиано Роналду клубийн түвшний 700 тоглолтод хожсон анхны төдийгүй цорын ганц хөлбөмбөгчин боллоо.
Түүнчлэн тэрбээр замналынхаа 921 дэх гоолыг “Аль-Раед” багийн хаалганд оруулсан. Түүний гоолын тоо хэзээ дөрвөн оронтой тооны босгыг давах вэ гэдэг асуулт олны анхаарлыг татаж байгаа нь гарцаагүй.
Роналду Саудын Арабын багт хүчин зүтгэх хугацаандаа 94 тоглолтод оролцож, 85 гоолыг оруулаад байна.
Клубийн түвшин дэх түүний 700 ялалтыг задалбал, “Спортинг”-ын хамтаар 13 тоглолтод, “Реал Мадрид”-ын хамтаар 316 тоглолтод, “Манчестер Юнайтед”-ийн хамт 214 тоглолтод хожсон бол “Ювентус”-тэй 91 тоглолтод, “Аль-Насср”-ын өмсгөлтэй 66 тоглолтод ялалт байгуулаад байгаа юм.
Тэрбээр Про лигийн энэ улирлын мэргэн буучдын жагсаалтыг 15 гоолтойгоор тэргүүлж байна.
