2025 оны 2-р сарын 12-нд, Хятадын Шаньдун мужийн Шунтянь хэмээх нэгэн групп компани ганц бие болон салсан ажилтнуудаа намар гэхэд гэрлэхийг шаардсан дотоод мэдэгдэл гаргажээ. Уг мэдэгдэлд 28-58 насны ганц бие болон салсан ажилтнуудыг гурван улирлын дотор гэр бүл зохиохыг үүрэг болгож, энэ хугацаанд гэрлээгүй тохиолдолд ажлаас нь чөлөөлөхөө мэдэгдсэн байна.
Энэхүү шийдвэр нь олон нийтийн шүүмжлэлд өртөж, хуульчид үүнийг Хятадын "Иргэний хууль"-ийг зөрчсөн гэж үзжээ. Тус хуульд иргэдийн гэрлэх эрх чөлөөг хамгаалсан байдаг бөгөөд ямар ч байгууллага эсвэл хувь хүн энэ эрхэнд халдах ёсгүй гэж заасан байдаг. Мөн "Хөдөлмөрийн гэрээний хууль"-ийн дагуу гэрлээгүй байх нь ажилтныг ажлаас чөлөөлөх үндэслэлд хамаарахгүй.
Шунтянь группийн энэхүү шийдвэр нь ажилтнуудын хувийн амьдралд хэт оролцсон, ёс суртахууны хэм хэмжээг хэтрүүлсэн үйлдэл гэж мэргэжилтнүүд үзэж байна. Тухайлбал, Тяньжиний Санхүү, Эдийн Засгийн Их Сургуулийн багш Жин Нюу энэ үйлдлийг "эцгийн эрх мэдэл"-ийн илрэл гэж нэрлэж, ийм арга хэмжээ нь олон нийтийн эсэргүүцэл, дургүйцлийг төрүүлж, гэр бүл, гэрлэлт, жирэмслэлтийн талаар эерэг соёлыг бий болгоход саад учруулна гэжээ.
Хятадад гэрлэлт, төрөлтийн түвшин буурч байгаа бөгөөд зарим байгууллагууд ажилтнуудаа гэрлэх, хүүхэдтэй болохыг уриалж байгаа ч, хууль зөрчсөн арга хэмжээ авах нь зохимжгүй болохыг харуулж байна.
Эх сурвалжууд: South China Morning Post, Huxiu, Secret China,
