Казахстаны Алматыд болсон чөлөөт бөхийн мэргэжлийн PWL лигийн найм дахь тэмцээнд хоёр барилдаж, хоёр даван гол баатраар шалгарсан АНУ-ын олимпын аварга Кайл Снайдер том мэдэгдэл хийлээ. Тэрээр энэ тэмцээнд Дагестаны Алихан Жабраилов, Казахстаны чөлөөт бөхийн анхны дэлхийн аварга Ризабек Айтмухан нарыг халз тулаанд дуудсан. Мэргэжлийн лигийн тэмцээнд бөхчүүд нэг удаа барилддаг ч Снайдер хоёр барилдсан ч болно гэж хэлсэн. Алихан Жабраилов өвчин тусаад ирж чадаагүй тул түүнийг Оросын Константин Пшеничников оролсон. Харин Снайдер тэр хоёрыг юм болгоогүй. Эхлээд Константин Пшеничниковыг 7:3 ялж, дараа нь казах аваргыг илт давуу 8:0 ялсан билээ.
Ингээд Кайл Снайдер мэргэжлийн PWL лигийн дараагийн тэмцээнд ороход бэлэн гэдгээ зарласан. Гэхдээ энэ удаад олимпын хошой аварга (2016, 2020) Абдулрашид Садулаев, 2024 оны олимпын аварга, Бахрейны Ахмед Тажудинов хоёрыг халз тулаанд дуудлаа. “Бусад бөхчүүд ганц барилдах ч би нэг өдөр хоёулантай нь барилдана” гэж омог бардам мэдэгдлээ.
