ОХУ-ын Ардын жүжигчин, 75 настай Алла Пугачёва хоёр шинэ бүтээл гаргалаа. Хоёулаа дайны тухай дуу байна.
“Мама” гэдэг дуунд дайнд амиа алдсан цэрэг хүүтэйгээ хүүрнэж байгаа эхийн яриаг өгүүлжээ. “Чи надаас хол байна. Чамгүйгээр надад хэцүү байна. Би шөнөөр нулимсаа нуудаг” хэмээн дуулж байна. Хөгжмийг Ленинград мужийн Андрей Мисин зохиосон бол үгийг Алла өөрөө бичсэн гэнэ.
"Поцелуй войны" буюу “Дайны үнсэлт” дуу нь 1944 онд Свирско-Петрозаводскийн чиглэлд ЗХУ-ын цэрэг Финландын армийн хамгаалалтыг сэтэлсэн тухай бүтээл юм. Хөгжмийн зохиолч нь Андрей Мисин, үгийг яруу найрагч Андрей Ордынец бичжээ.
Алла Пугачёва нөхөр Максим Галкиний хамт 2022 онд Украины эсрэг дайныг шүүмжлээд эх орноосоо гарч явсан. Одоо тэр хүүхдүүдийн хамт Кипрт амьдарч байгаа юм.
