"Сэлбэ сэргэлт" төслийн эхний ээлжийн үерийн хамгаалалтын далан барих ажлыг Улаанбаатар хотын үерийн хамгийн өндөр эрсдэлтэй бүс болох БЗД-ийн 43 дугаар хороо, Натур орчмоос эхлүүлсэн. “S’Outlets” дэлгүүрийн буулгасан талбайд 1.4 км үргэлжлэх түшиц ханыг хийхээр төлөвлөж, өнөөдрийн байдлаар 1.2 км-ийг хийгээд байна. Энэ талаар гүйцэтгэгч компани "Билгүүн Монгол Констракшн" ХХК-ийн ахлах инженер И.Сумьяабазар “Манай компани 2024 оны зургаадугаар сард барилга угсралтын ажлыг эхлүүлсэн. Өнөөдрийн байдлаар ажил 80 гаруй хувьтай үргэлжилж байна. Ирэх зургаадугаар сарын 30-нд үерийн хамгаалалтын далангийн цутгалтын ажлыг бүрэн дуусгана. Үүний дараагаар голын тохируулга, хашлага хайс, голын бэхэлгээ чулууг хийж, ирэх наймдугаар сарын 1-нд бүрэн хүлээлгэж өгөхөөр ажиллаж байна” гэв.
Энэхүү далангийн хана 70-30 сантиметр зузаан хувьсах өргөнтэй, 4.5 метрийн өндөртэй. Мөн "Сэлбэ сэргэлт" төслийн дараагийн үе шатны ажлуудтай уялдана гэдгийг албаныхан онцоллоо. Мөн үерээс хамгаалах далангийн ажлыг бүрэн дууссаны дараа тохижуулж эхэлнэ.
