Унгарын Будапешт хотноо явагдаж буй жүдо бөхийн ДАШТ-ий сүүлчийн өдрийн барилдаанууд ид өрнөж байна.
Өнөөдөр татамид эрэгтэйчүүдийн +100 кг, эмэгтэйчүүдийн +78 кг-ын жингийн бөхчүүд хүч сорьсон юм.
Эрэгтэйчүүдийн +100 кг-д зодоглосон Азийн наадмын үзүүр бөх, Азийн АШТ-ий хошой хүрэлтэй Б.Гончигсүрэн эхний тойрогт гоц мөргөлөө.
Тэрбээр Египетийн тамирчин, Африкийн хошой аварга Мохамед Аборакия, Японы бөх, Азийн аварга Хёга Ота нарыг давж шигшээ наймд шалгарсан.
Гэвч “Парис-2024” олимпын хүрэл медальт Темур Рахимовыг оноогоор хожиж байгаад даралтаар ялагдав. Улмаар дагах барилдаанд Оросын тамирчин, “Токио-2020” олимпын хүрэл, ДАШТ-ий мөнгө, хүрэл медальт Тамерлан Башаевт унаснаар ДАШТ-ийг VII байраар дуусгалаа.
Өдгөө 25 настай Б.Гончигсүрэн Насанд хүрэгчдийн ДАШТ-д дөрөв дэхиэ оролцсон нь энэ юм.
Эмэгтэйчүүдийн +78 кг-ын жинд барилдсан Азийн АШТ-ий мөнгө, хүрэлтэй, Азийн наадмын хүрэл медальт А.Адьяасүрэн, Мастерсийн хүрэлтэй, Нидерландын Карен Стивенсонд ялагдаж, мултарсан.
Өдгөө 25 настай А.Адьяасүрэн Насанд хүрэгчдийн ДАШТ-д тав дахиа зодоглосон нь энэ боллоо.
Жүдо бөхийн ДАШТ маргааш багийн барилдаанаар үргэлжилнэ.
