1 мин

АНУ-д Pfizer вакциныг ирэх 7 хоногоос 12-15 насны хүүхдүүдэд хийж эхэлнэ

Ub.life 2021.05.04

АНУ-ын Хүнс ба Эмийн захиргаа (FDA) ирэх долоо хоногоос эхлэн Pfizer вакциныг 12-15 насны хүүхдүүдэд яаралтай горимоор хэрэглэхийг зөвшөөрсөн тухай засгийн газрын эх сурвалж мэдээлжээ.

Аливаа вакцинд яаралтай горимоор хэрэглэх зөвшөөрлийг олгохын тулд АНУ-ын Хүнс ба Эмийн захиргаа Вакцин ба биологийн бүтээгдэхүүний хараат бус зөвлөх хороог хуралдуулж, вакцин үйлдвэрлэгчдийн ирүүлсэн мэдээлэлд тулгуурлан санал хурааснаар шийдвэрээ гаргадаг байна. Энэ удаа уг хуралдааныг зохион байгуулахгүй, харин АНУ-ын Хүнс ба Эмийн захиргаанаас гаргасан шийдвэрийг АНУ-ын Өвчнийг хянах, урьдчилан сэргийлэх төв (CDC) хянаж, Pfizer вакциныг 12-15 насны хүүхдүүдэд хийж болох эсэхийг шийднэ гэжээ.

Одоогийн байдлаар АНУ-д Pfizer болон Moderna вакциныг 16-аас дээш насны иргэдийг дархлаажуулахад ашиглаж буй. Мөн үйлдвэрлэгчид Pfizer болон Moderna вакциныг 6 сараас 15 настай хүүхдүүдэд туршиж байна.

Pfizer-BioNTech компаниудын хамтран боловсруулсан вакцины хүүхдүүдэд хийсэн клиник туршилтын үр дүн гуравдугаар сарын сүүлээр гарсан юм. Гуравдугаар шатны туршилтад 12-15 насны 2,260 хүүхэд хамрагдсан бөгөөд энэ насны хүүхдүүдэд вакцин 100 хувь үр дүнтэй байгааг Pfizer компани мэдэгджээ.

Эх сурвалж: CNN