Кофе дэлхийг өөрчилсөн цөөн зүйлсийн нэг. Тэгвэл кофетой эн дүйцэхүйц, гэхдээ илүү урт удаан “эрүүл” түүхтэй цайнд дурлагсдыг дутуу үнэлэх хэрэггүй. “Амьтны ферм” зохиолоор нь бидний эчнээ мэдэх нэрт зохиолч Жорж Оруэлл 1946 онд “Аяга сайхан цай” /“A Nice Cup of Tea”/ эссэндээ төгс аяга цай бэлтгэх дараах 11 дүрмийг танилцуулжээ.
“Аяга сайхан цай” бэлтгэх Жорж Оруэллийн 11 дүрэм
Аятайхан аяга цай ууя гэвэл би зайлшгүй доорх 11 дүрмийг дагадаг. Хоёр дүрэм нь ердийн үйлдэл бөгөөд 11 дүрмээс ядаж дөрөв нь хэн бүхэнд хэрэг болохуйц гэж найдаж байна.
1. Энэтхэг юм уу, цейлон цай уу /Аль аль нь өтгөн хар цай бөгөөд цейлон цайг хандлахад тод улаавтар өнгөтэй болно/. Хятад цайны өнгө үнэр таатай. Гэхдээ уусны дараа сэтгэл сэргэж, ухаан санаа саруулшиж, зориг орох нь юу л бол.
2. Цай маш бага байх бөгөөд зөвхөн гүцэнд байх ёстой.
3. Цайгаа хийхээс өмнө гүц дулаан байх хэрэгтэй. Эс бөгөөс цайны илч гүцэнд шингээд та бүгээн цай л хүртэх болно гэж мэд.
4. Цайгаа өтгөн хий. Нэг аяга час хийсэн цай сулхан 20 аяганаас дээр.
5. Цайг шууд гүцэнд уудална. Халуун савны тухай март.
6. Цайг нэг л удаа буцалгана.
7. Маш тайван, зөөлөн хэмнэлээр хутгана.
8. Сайхан цайг сайхан аяганд уух хэрэгтэй. Ингэхдээ бортого хэлбэртэйг сонгох бөгөөд хэт өндөр эсвэл хэт бүдүүн аяганаас татгалзаарай. Ийм аяганд цай дорхноо хөрөх аюултай.
9. Болж өгвөл сүү битгий хий. Хиймээр санагдаад болохгүй бол тослоггүй сүү сонгоорой. Тослог сүү цайг үлбэгэр болгоно.
10. Цайг данханд юм уу, гүцэндээ бэлтгэсэн бол шууд аяганд хийнэ.
11. Эцэст нь, аятайхан сайхан цай ууя л гэж бодож байвал элсэн чихрийн тухай март. (Орос хэв маягаар уух гээгүй л бол) Давс, элдэв амтлагч ч хэрэггүй. Цай өөрийн амтаараа, чамгүй гашуун байх ёстой. Шар айраг руу чихэр хийдэггүй биз? Чихэртэй цай бол цай биш цайтай чихэр. Чихэр уухыг хүсвэл бүлээн усанд уусгаад л ууна биз.
Зарим хүмүүс цай ууж байна гэж боддог ч үнэндээ цай уудаггүй. Тэд зүгээр л халуун дулаан илч мэдэрч, амт таашаалтай чихэр амтлахыг хүсдэг. Эдгээр өрөөсгөл ойлголттой хүмүүст зөвлөхөд, нэг л удаа дээрх дүрмийн дагуу чихэргүй "төгс" цай уугаад үз. Төсөөлсөн шиг чинь амтагдахгүй нь мэдээж ч ахиж элдэв ус руу хошуугаа сунгахгүй нь лавтай."
1946 оны нэгдүгээр сарын 12
