1 мин

Хоосон дэлгэц ширтэн ажиллаж буй ерөнхийлөгчийн зураг солонгосчуудыг гайхашруулав

Ub.life 2022.07.05

Өмнөд Солонгосын Ерөнхийлөгч Юн Сүк Ёл өнгөрсөн долоо хоногт Испани улсад дөрвөн хоногийн айлчлал хийсэн юм. Хөх ордноос Ерөнхийлөгч болон тэргүүн хатагтай Ким Кеон Хи хоёрын Испанид хийж буй айлчлалтай холбоотой 12 зургийг өнгөрсөн ням гарагт цацжээ. Гэтэл тэдгээрээс нэг зураг нь олон нийтийг гайхшруулж, цахим орчинд ярианы сэдэв болж байна.

Тодруулбал, Ерөнхийлөгч Юн Сүк Ёлын хоосон компьютерийн дэлгэцийн ард ажиллаж буй зураг ийн маргаан дагуулжээ. Ерөнхийлөгчийн тамгын газраас мэдээлэхдээ, Юн Сүк Ёл өнгөрсөн мягмар гарагт туслахуудтайгаа уулзалт хийж, дараа нь НАТО-гийн дээд хэмжээний уулзалтад бэлдэж байх үеэр энэ зургийг дарсан хэмээжээ.

Гэсэн ч олон нийтийн хардалт намжаагүй учир Ерөнхийлөгчийн тамгын газар даваа гарагт дахин мэдэгдэл гаргасан байсан. Уг мэдэгдэлд "Ерөнхийлөгчийн зургийг нийтлэхдээ аюулгүй байдал болон бусад шалтгааны улмаас монитор эсвэл Ерөнхийлөгчийн уншиж буй баримт бичигт юу байгааг харуулахгүй байхыг хичээдэг. Бид Хөх ордонтой холбоотой аливаа зургийг нийтлэхдээ няхуур ханддаг. Гэтэл биднийг шоу хийж, ажиллаж байгаа мэт дүр эсгэж байна хэмээн гуйвуулж байгаад үнэхээр харамсаж байна" гэжээ.

Холбоотой мэдээлэл: Өмнөд Солонгосын ерөнхийлөгчөөр сонгогдсон Юн Сок Ёлын тухай 8 БАРИМТ

Эх сурвалж: Yonhap