Саки Тамогами 16 жилийн турш хэмнэлттэй амьдарсны үр дүнд 34 насандаа гурван үл хөдлөх хөрөнгийн эзэн болжээ. Тэрбээр 18 наснаасаа эхлэн өөрийн гэсэн орон сууцтай болохоор мөрөөдөж эхэлсэн бөгөөд үүндээ хүрэхийн тулд олон жилийн турш төсөөлөхөд бэрх хэмнэлттэй амьдрах замыг сонгожээ.
Тамогами хоол хүнсэндээ өдөрт ердөө 200 иен (ойролцоогоор 1.50 доллар) зарцуулдаг байсан гэнэ. Тэр ихэвчлэн ногоотой удон гоймон иддэг байсан ба 50 иен (0.38 доллар) -ээр хүнсний материалаа худалдаж авдаг байсан гэж ярьжээ. Аяга таваг угаах шингэнээ хэмнэхийн тулд хоолоо шууд савнаас нь иддэг байсан аж.
Үүгээр зогсохгүй зөвхөн хямдралтай бараа бүтээгдэхүүн, хүнс худалдаж авах, шинэ хувцас авахын оронд хуучин хувцасны дэлгүүр хэсэж, хамаатнуудаасаа өмсөхөө больсон хувцсыг авдаг байсан хэмээжээ. Мөрөөдлөө биелүүлэхийн тулд үсээ тайрч, 3100 иенээр худалдаж (23.40 доллар) байсан тохиолдол ч байсан байна.
Ийнхүү Тамогами сайтар хэмнэж, хадгалсны хүчинд 27 настайдаа Сайтама хотод анхны байшингаа 10 сая иенээр (75,000 доллар) худалдаж авчээ. Хоёр жилийн дараа 18 сая иенээр (140,000 доллар) хоёр дахь байшингаа, 2019 онд 34 нас хүрэхдээ 37 сая иенээр (280,000 доллар) гурав дахь байшингаа худалдан авснаар мөрөөдөл нь биелжээ.
Өдгөө 37 настай Тамогами үл хөдлөх хөрөнгийн салбарт ажиллаж байгаа бөгөөд гурван байшингаа түрээслүүлж хангалттай орлого олдог болжээ. Мөн тэрбээр гудамжнаас тэнэмэл мууруудыг аварч, Cafe Yunaagi нэртэй муурны кафе ажиллуулж байгаа гэнэ.
Эх сурвалж: Yahoo
