Хуурамчаар өмгөөлөгчийн дүр эсгэн 26 удаагийн шүүх хуралд оролцсон Кени улсын иргэн Бриан Мвенда гэх залууг цагдаа нар баривчилжээ. Тэр ямар ч хуулийн мэргэжил эзэмшээгүй хэрнээ оролцсон бүх шүүх хуралдаа ялалт байгуулсан нь олныг гайхшируулж байна.
Бриан өөрийгөө өмгөөлөгч хэмээн танилцуулан хүмүүсийн хэргийг хүлээн авч, улмаар давж заалдах шатны шүүх, дээд шүүхийн хэргүүдэд ч ялалт байгуулсан гэнэ. Түүнийг хуулийн нийгэмлэг сэжиглэж, олон арван өмгөөлөгчид шалгуулахыг хүссэн тул цагдаа нар түүнийг удаа дараа байцаасны эцэст л жинхэнээсээ өмгөөлөгч биш, ердөө дүр эсгэж байсныг нь мэдсэн гэжээ. Брианыг байцааж байгаа бөгөөд зохих ёсны ял ногдуулахыг хуулийн нийгэмлэгээс шаардаж байна.
Харин Кенийн Үйлдвэрчний эвлэлийн байгууллагаас Брианыг ялаа эдэлж дууссаны дараа хамтран ажиллахад нээлттэйгээ илэрхийлж, "Зөвөөр ашиглаж чадвал амжилтад хүрэх боломжтой гайхалтай оюун ухаан" хэмээн магтсан гэнэ.
Эх сурвалж: Nigerian Tribune
