Монголын кино институт, Lotus Pictures хамтран 12 дахь Алтан Өргөө олон улсын кино наадмыг Соёлын яам, Кино урлагийн зөвлөлийн Кино урлагийг дэмжих сангийн санхүүжилтээр 2024 оны 5 сарын 8-12-нд зохион байгуулах гэж байна.
Алтан Өргөө Олон Улсын Кино Наадам нь 2013-2023 онд нийт 70 гаруй орны 3532 олон улсын болон Монгол богино бүтээлүүд бүртгэн авч түүнээс 351 бүтээл уралдаант хэсэгт сонгогдож 80 бүтээл нь манай кино наадмаас шагнал хүртэж байсан түүхтэй билээ. Бидний гол зорилго бол Монголын шинэ залуу кино уран бүтээлчдийн уран чадварыг хөгжүүлэхэд хувь нэмэр оруулах юм. Мөн кино наадам маань Монгол болон олон улсын уралдаант хэсэг, богино хэмжээний киноны сонгомол үзвэр, бүрэн хэмжээний киноны тусгай үзвэрүүд, мастер класс, хэлэлцүүлэг хэсгүүдээс бүрдэх болно.
Алтан Өргөө кино наадмын Монгол уралдаант хэсэгт 4 сарын 15-г хүртэл богино кино хүлээн авч эхэлсэн бөгөөд уран бүтээлчид дараах шагналуудын төлөө өрсөлдөх болно.
Алтан Өргөө дээд шагнал (5,000,000 ₮)
Шилдэг Монгол хүүхэлдэйн кино (1.000.000 ₮)
Шилдэг Монгол хүүрнэлт кино (1.000.000 ₮)
Шилдэг Монгол баримтат кино (1.000.000 ₮)
Шилдэг Монгол эксперименталь кино (1.000.000 ₮)
Бүртгүүлэх богино кино бүтээлүүд нь төрлөөсөө хамааран 3-30 минутын урттай, сүүлийн 3 жилд хийгдсэн Монголд ямар нэг кино наадамд ороогүй бүтээл байх ёстой юм. Мөн бид уран бүтээлийн гоо зүй, агуулга дээр илүү анхаарлаа хандуулдаг тул тодорхой техникийн үзүүлэлт дээр шаардлага тавьдаггүй билээ.
Монголын уран бүтээлчид богино киногоо наадмын Монгол уралдаант хэсгийн сонгон шалгаруулалтад дараах холбоосоор бүртгүүлээрэй: https://www.mfi.mn/submission
