23 настай Г.Мөнх-Ёндон Монгол бөхийн өргөөнд анх удаагаа түрүүллээ
Сумын цолтой болон залуу бөхчүүдийн ээлжит барилдаан өнөөдөр Монгол бөхийн өргөөнөө явагдаж, эр бяр тэгширсэн 544 бөх зодоглолоо.
Эл барилдаанд Өвөрхангай аймгийн Хархорин сумын заан Г.Мөнх-Ёндон арав давж түрүүлэв. Тэрбээр 2022 онд Архангай аймгийн Хашаат сумын наадамд түрүүлж сумын заан цолонд хүрсэн агаад өнгөрсөн зун Хархорин сумын наадамд үзүүрлэсэн бөх юм.
Харин үзүүрт сумын баяр наадмын гурван түрүүтэй манлай заан Дэлгэрийн Цэрэнням шалгарлаа. Д.Цэрэнням зааны хувьд бөхийн өргөөнд явагдсан сумын заануудын барилдаанд ес дахь удаагаа түрүү үзүүр булаалдсанаас гуравт нь түрүүлээд байна.
Тэд хоёрдугаар сард тааран барилдахад Д.Цэрэнням давсан бол 2022 оны хоёрдугаар сард Г.Мөнх-Ёндон түүнийг хаяж байсан.
Шөвгийн гуравт, Баянхонгор аймгийн Жаргалант сумын харьяат, сумын заан Э.Совджамц шалгарлаа. Тэрбээр сумын баяр наадамд таван удаа түрүүлж, гурвантаа үзүүрлэсэн бөх. Мөн заалны барилдаанд гурван удаа үзүүрлэсэн нь таван жилийн өмнөх амжилт билээ.
Гуравдугаар сарын 15-ны 11:00 цагаас Хөвсгөл аймгийн Цагаан-Уул сумын харьяат, аймгийн хурц, бадрангуй, хичээлт арслан Бат-Очирын Баттогтохын нэрэмжит аймаг, цэргийн цолтой болон залуу 256 бөхийн барилдаан явагдана.