Нэгнээрээ тоглоом тохуу хийж, шоглодог хосуудын харилцаа илүү бат бөх байдаг
АНУ-ын Канзасын Их сургуулийн судлаач, профессор Жеффри Холлоор удирдуулсан судалгааны баг 30 жилийн хугацаанд 15 мянга гаруй хүнийг хамарсан 39 төрлийн судалгаанд үндэслэн сонирхолтой баримтыг танилцууллаа. Нэгнээрээ тоглоом тохуу хийж, чөлөөтэй шоглон инээлддэг хосуудын салах магадлал бага, харилцаа нь урт хугацаанд бат бөх үргэлжилдэг аж.
"Инээдээр дамжуулан хүн амьдралын баяр таашаалыг мэдэрдэг. Шооч хошин зантай хүн бусдын сэтгэлийг их татдаг. Хосын харилцаанд ч алиа хошин зантай хүнтэй хамт байхад стресс намжиж, урт хугацааны тогтвортой харилцааг бий болгох ач тустай. Хайртай хүнээрээ тоглож, инээлгэж, шоглох нь харилцааг илүү дотно, сонирхолтой болгодог болохыг бид олон мянган хосуудын харилцаанд үндэслэн тогтоолоо" гэж Жеффри Холл хэлжээ.
Гэвч нэгнээрээ тоглоом тохуу хийхэд ч хязгаар бий. Доромж утгатай, үнэт зүйл рүү нь халдсан, "доош нь" хийсэн хошигнол харилцааг харин ч хөндийрүүлэхийг судлаачид анхааруулж байна.
Хайртай хүнээ инээлгэн, шоглох нь тэднийг дотносуулж, стрессийг намжааж, дархлааны системийг дэмжин, нэгнээ мэдрэн илүү сайн ойлголцоход нөлөөлөх зэрэг олон давуу талтай гэнэ.
Эх сурвалж: Bright Side