Б.Одгэрэл Азийн АШТ-ий хагас шигшээд шалгарлаа
Киргизстаны Бишкек хотноо чөлөөт бөхийн Азийн АШТ хоёр дахь өдрөө үргэлжилж байна. Эл тэмцээнд нэгдүгээр сард явагдсан Улсын АШТ-ээс олимпын жинд мөнгөн медаль хүртсэн болон олимпын бус жингүүдэд түрүүлсэн тамирчид зодоглоно. Мөн олимпын эрхээ баталгаажуулсан хоёр тамирчин өрсөлдөх юм.
Монголын бөхчүүдээс 125 кг-ын жинд зодоглосон өнөө жилийн Улсын АШТ-ий үзүүр бөх аймгийн начин Б.Одгэрэл хагас шигшээ шатнаа шалгарлаа.
Тэрбээр эхний тойрогтоо Сирийн Саремийг 2:0-ээр ялж, улмаар Узбекистаны бөх Холматовыг 6:0-ээр илүүрхсэн юм. Б.Одгэрэл тун удахгүй хагас шигшээд барилдана.
Өнөөдөр барилдсан монголын бөхчүүдээс Н.Батбилгүүн, Э.Энхболд, Д.Батзул нар хоёр дахь барилдаандаа ялагдсан бол Б.Батбаяр эхний тойрогтоо унасан юм. Эдгээр бөхчүүдийг давсан тамирчид финалд шалгарвал тэд хүрлийн төлөө барилдана.
Монголын бөхчүүдээс, Азийн АШТ-ий эхний өдөр гавьяат тамирчин Т.Тулга, залуу тамирчин Э.Бямбадорж нар мөнгөн медаль хүртсэн билээ.
Гэрэл зургийг: Д.Нямбилэг
Зураг | Тайлбар |