1 мин

Архангайн бөхчүүд "Алтан цом"-ын хагас шигшээд шалгарлаа

У.Чинзориг 2024.04.15

Монголын Үндэсний бөхийн холбоо өнгөрсөн жилээс "Алтан цом"-ын төлөөх цуврал барилдааныг зохион байгуулж эхэлсэн билээ.

Анхны улирлын өрсөлдөөнд Архангай аймгийн бөхчүүд түрүүлсэн. Тэдний аварга авсан бүрэлдэхүүнээс өнөө жил Төрийн наадмын түрүү бөх М.Бадарч хасагдаж, харин заалны барилдаануудад гялалзаж, айсуй цагийн идэрхэн хүчтэн гэдгээ нотолсон цэргийн заан Өнөрбаянгийн Батсуурь нэмэгдээд буй.

Архангайнхан өнөөдөр Төв аймгийн бөхчүүдийг 18:7-гоор илүүрхэн, "Алтан цом"-ын хагас шигшээд шалгарлаа. Тэд цомоо хамгаалахад ердөө хоёрхон даваа үлдээд байна.

4-р сарын 16-нд 19:45 цагаас Өвөрхангай болон Өмнөговь аймгууд барилдах бол 4-р сарын 18-нд 19:45 цагаас Увс болон Говьсүмбэр, 4-р сарын 19-нд 19:45 цагаас Ховд болон Баян-Өлгий аймгуудын өрсөлдөөн хүлээж байна.

Архангай аймгийн бөхчүүдтэй цааш аваргын төлөө өрсөлдөх гол багуудын жагсаалтад Ховд, Увс гэсэн аймгууд багтаж байна. Ховд аймгийн бөхчүүд өнгөрсөн жилээс өдийг хүртэлх заалны барилдаануудын өнгөнд барилдаж, бараг л завсар зайгүй шахам шөвгөрөн, голцуу түрүү үзүүр рүү өгсөн барилдаж байгаа.

Харин өнгөрсөн жилийн "Алтан цом"-ын үзүүр Булганы начингуудыг эл тэмцээнээс мулталсан Баян-Өлгийн бөхчүүд улсын заан Б.Серикээр хүчээ зузуутгажээ.

Үүнээс гадна олон аваргуудыг эгнээндээ нэгтгэсэн Увс аймгийн бөхчүүдийг ч тэргүүн байрын өрсөлдөөнөөс мартаж болохгүй биз ээ.