2 мин

Коул Палмер Премьер лигийн мэргэн буучаар тодрох боломжтой юу?

У.Чинзориг 2024.04.16

Английн Премьер лигийн 33-р тойргийн хүрээнд өнгөрсөн шөнө явагдсан "Челси" болон "Эвертон" багуудын тоглолт 6:0-ээр талбайн эздийн ялалтаар өндөрлөлөө.

Эл тоглолтод Коул Палмер дөрвөн гоолыг оруулан гялалзав. Тэрбээр Премьер лигийн тоглолтод дөрвөн гоол оруулсан "Челси"-гийн дөрөв дэх тоглогчоор тодорлоо.

Энэ улирлын Премьер лигт оруулсан түүний гоолын тоо 20-д хүрснээр мэргэн буучдын жагсаалтыг Эрлинг Хааландын хамтаар тэргүүлж эхлэв. Өдгөө түүний нэр "Алтан шаахай"-н төлөөх өрсөлдөөнд албан ёсоор бичигдэх боллоо.

Палмер өнгөрсөн зун "Манчестер Сити"-гээс "Челси"-д нэгдсэн агаад өнөө жил 21 настай.

Тэрбээр мөн энэ улирлын Премьер лигт есөн гоолын дамжуулалт өгсөн амжилтаараа тус жагсаалтын хоёрдугаар эгнээнд бичигдэж байна.

Палмер "Челси"-гийн төлөөх Премьер лигийн анхны улиралдаа 20 гоолыг оруулсан гурав дахь тоглогч юм.

Харин тэрбээр улирлын төгсгөлд "Алтан шаахай"-г авч чадах уу, үгүй юу гэдэг асуулт анхаарал татаж байна.

Эрлинг Хааланд өнгөрсөн улирлын Премьер лигт 35 тоглолтод оролцохдоо 36 гоол оруулж, дээд амжилт тогтоосон учраас энэ удаад ч Палмерт багагүй сорилт байх нь тодорхой.

Гэхдээ Хааландын хувьд, "Манчестер Сити" болон Норвегийн шигшээ багийн төлөөх сүүлийн найман тоглолтодоо ердөө хоёр гоолыг оруулаад байгаа юм.

Олли Уаткинс мэргэн буучдын хоёрдугаар эгнээнд Хааланд, Палмер нараас нэг гоолоор дутуу бичигдэж байна. Түүний оруулаад буй 19 гоол бол "Астон Вилла"-гийн тоглогчдоос сүүлийн хэдэн жилд хүрээгүй өндөр босго агаад 2012-13 оны бүтэн улиралд хийсэн Кристиан Бентекегийн гоолын тоотой эн тэнцэх үзүүлэлт юм.

Харин тэргүүлэгчдээс гурван гоолын дутуу "Ливерпүүл"-ийн довтлогч гурван удаагийн "Алтан шаахай" шагналын эзэн Мохамед Салах жагсаж байна. Түүний Премьер лигт оруулаад буй 17 гоол нь "Борнмут"-ын Доминик Соланке, "Ньюкасл"-ийн Александр Исак нарынхтай эн тэнцүү үр дүн гэсэн үг.

"Тоттенхэм"-ийн Сон Хён Мин, "Вест Хэм"-ийн Жаррод Боуэн нар тус бүр 15 гоолыг оруулаад байна.