UFC аваргууд алтан бээлийтэй тулалдана
UFC 300 тэмцээний үеэр холбооноос шинэ бээлий танилцууллаа. Ингэхэд тулааны бээлийний юу нь өөрчлөгдсөн юм бол?
Юуны өмнө бээлийний эсгүүр өөрчлөгдсөн. Бээлийний бугуйн хэсэгт чангалдаг хоёр бүслүүр шинээр нэмэгдсэн. Энэ бүслүүр нь тамирчны бугуйг гэмтлээс хамгаалах, мөн барилдааны үед тулаанчийн хуруу өрсөлдөгчийн бээлийнд орохоос хамгаалах үүрэгтэй. Шинэ бээлийний цохилт хийдэг хэсгийг оёдолгүй аргаар хийсэн тул тамирчдын нүүр, ил хэсгүүд зүсэгдэх аюулгүй. Мөн алгаа дэлгэхэд хэцүү болгох тул сүүлийн үед асуудал үүсгээд байгаа нүд рүү чичих явдал үгүй болох юм.
Орчин үеийн хөнгөн материалаар хийдэг болсон учир тулаанчдын гэмтэл эрс цөөрнө.
Тэмцээн, тулаанаас шалтгаалан өөр өөр өнгийн бээлийтэй тулалдана. Чансааны жирийн тулаануудад гарсан тамирчид хар, харин аваргууд алтан шар бээлийтэй гарах юм. Харин Dana White’s Contender Series цуврал тэмцээнд хөх бээлий, Road to the UFC гэх мэт тусгай төсөлд гарах тамирчид улаан бээлийтэй гарах болно.