Б.Баасанхүү жүдо бөхийн Азийн АШТ-д анх удаагаа түрүүллээ
Жүдо бөхийн Азийн АШТ 4-р сарын 20-22-ний өдрүүдээр Хонгконгд зохион байгуулагдаж байна. Өнөөдөр хөнгөн жингийн барилдаанууд явагдлаа.
Монголын бөхчүүдээс 48 кг-д зодоглосон Бавуудоржийн Баасанхүү өнөөдөр нэвтхэн барилдаж, өрсөлдөгч бөхчүүдээ төвөггүй ялснаар Азийн аварга боллоо. Хэдхэн хоногийн өмнө Монгол Улсын аваргаар гурав дахиа тодорсон түүний хувьд, 2024 он гарснаар олон улсын тэмцээнээс анхны медалиа зүүсэн нь энэ.
Харин тус жинд өрсөлдсөн Г.Наранцэцэгийн хувьд, Хойд Солонгосын бөхтэй учраа тааран зодоглосон ч, идэвхгүй барилдсан хэмээн үзэж шүүгч хоёуланг нь хассан юм.
Сонирхуулахад, гурван сарын дараагаас хөшгөө нээх “Парис-2024” олимпын наадмын чансаагаар Б.Баасанхүү жиндээ 13-р байрт бичигдэж байгаа бол Г.Наранцэцэг түүний чанх ард эрэмблэгдэж байна.
Харин дэлхийн чансаанд тэднийг дөрвөн байр зааглаж, Г.Наранцэцэг өмнө нь бичигдэж байна. Ямартаа ч энэ хавар болох олон улсын тэмцээнүүдэд тэдний хэн нь форм сайтай байж, өндөр түвшний тамирчидтай хэрхэн зодоглохоос хамаарч зөвхөн нэг нь л олимпод эх орноо төлөөлөн барилдах учиртай.
Тун удахгүй 66 кг-д Б.Эрхэмбаяр, 57 кг-д Л.Энхрийлэн нар алтан медалийн төлөө барилдана.
Мөн 60 кг-д Б.Цогт-Очир, 52 кг-д Л.Сосорбарам, 57 кг-д М.Ичинхорлоо нар хүрэл медалийн төлөө өрсөлдөх юм.