1 мин

"Байер Леверкузен" клубийнхэн 98 дахь минутад гоолдож, хожигдолгүй цувралаа 45-д хүргэлээ

У.Чинзориг 2024.04.22

Ням гарагт явагдсан Германы Бундес лигийн 30-р тойргийн оргил тоглолт "Боруссиа Дортмунд" болон "Байер Леверкузен"-ий өрсөлдөөн 1:1-ээр өндөрлөв.

Шаби Алонсогийн залуус энэ улирлын анхны ялагдлаа хүлээхэд тун чиг ойртсон боловч, 98 дахь минутад Йосип Станисич гоолдсоноор Германы шинэхэн аваргуудын хожигдолгүй цуврал 45-д хүрлээ.

Мягмар гарагт "Атлетико Мадрид"-ыг мулталж, Аваргуудын лигийн хагас шигшээд шалгарсан "Дормунд"-ын хувьд, 57 оноотойгоор Бундес лигийн тавдугаар байрт бичигдэж байна.

Харин "Леверкузен" өнгөрсөн долоо хоногт "Вердер Бремен"-ийг 5:0-ээр буулган авч, Бундеслигийн анхны цомоо өргөх албан ёсны болзлоо хангасан билээ.

Испанийн Баскаас гаралтай 42 настай эрхэм өнөө жил "Леверкузен"-ий хувь заяаг бүхэлд нь өөрчилсөн. Алонсо дасгалжуулагчийн замналаа дөнгөж л эхлүүлж байгаа хэдий ч 45 тоглолтын туршид хожигдолгүй цувралаа үргэлжлүүлнэ гэдэг түүхэн дэх хамгийн аугаа үйл явдлуудын нэг гэдэг нь гарцаагүй билээ.

Эл амжилт нь түүнийг өдгөө дэлхийн шилдэг клубүүдийн хүсэмжит дасгалжуулагч болгожээ.

Гэхдээ "Леверкузен"-ий хувьд, энэ улирлын өрсөлдөөн дуусаагүй. Тэд Европа лигийн хагас шигшээ шатнаа үлдээд байгаа агаад хэрэв түрүүлбэл, Алонсогийн хувьд, малгайгаа ахин нэг удаа өндөрт шидэх биз ээ.