1 мин

150 см намхан сүмочтой болно

М.Сугар-Эрдэнэ 2024.04.22

Сүүлийн жилүүдэд сүмоч болох хүсэлтэй хүүхэд, багачуудын тоо эрс цөөрсөөр байна. Японы сүмо бөхийн холбооноос бөхчүүдийн тоог нэмэгдүүлэх арга хэмжээ авч байгаагийн нэг нь сүмочдын шинэ бөхийн шалгалтын өөрчлөлт байлаа. Шалгалтад орж байгаа залуучуудад 167 см-аас доошгүй өндөр, 67 кг-аас доошгүй жинтэй байхаар заасан байдаг. Тэгвэл энэ сараас эхлэн дээрх үзүүлэлтийг хангаж чадаагүй байсан ч эрүүл энх, биеийн хөдөлгөөн сайн бол хоёр дахь шалгалтад орж болохоор шийдвэр гаргасан билээ. Гэхдээ Токиод болдог тэмцээний л өмнө авч байх юм.

Шинэ бөхийн хоёр дахь шалгалтад орохоор ганц хөвгүүн ирсэн нь 15 настай Мотомүра Косэй байлаа. Түүнээс гарын хүч, 50 метр гүйлт, үсрэлт зэрэг долоон шалгалт авлаа. Мотомүра 50 метрт 7.91 секунд гүйж, өндөр нь 159,5 см, жин нь 67,6 кг заажээ.

Түүнийг бага ангид байхаас нь Садогатакэ ояката дэвжээндээ урьж байсан гэнэ. Озэки асан Котошёогикү буюу тус ояката “Мотомүра мэргэжилд орохыг маш их хүсэж байгаа. Ашгүй шалгалтаа амжилттай даваад гараад ирлээ” гэж сэтгүүлчдэд ярьсан байна. Харин Мотомүра “Мэргэжлийн сүмоч болох нь миний мөрөөдөл. Өсөж өндөр болохгүй, жин ч нэмэхгүй болохоор надад их хэцүү байсан” гэж сэтгэгдлээ хуваалцжээ.

Ийнхүү дэлхийн дайнаас хойш анх удаа мэргэжлийн сүмод 160 см-аас намхан бөх гарч ирлээ.