Харри Кэйн "Байерн Мюнхен"-д хүчин зүтгэсэн эхний улиралдаа 40 гоолын босго давлаа
Өнгөрсөн амралтын өдрөөр Германы Бундес лигийн 30-р тойрогт явагдсан "Байерн Мюнхен" болон "Юнион Берлин" клубүүдийн тоглолтод талбайн зочин баг "Байерн" 5:1-ээр хожив.
Германы үнэмлэхүй ялагчид Аваргуудын лигт "Арсенал-ыг хожсоныхоо дараагаар унах бүсээс хоёрхон онооны дээр байгаа "Юнион Берлин"-ий эсрэг урам зоригтой тоглож, ялалт байгуулсан нь энэ.
Эл тоглолтод гоол оруулсан Английн шигшээ багийн ахлагч Харри Кэйн "Байерн Мюнхен"-д хүчин зүтгэсэн эхний улиралдаа 40 гоолын босго давлаа. Энэ гоол нь түүний хувьд, Бундес лигийн 30 тоглолтод оролцохдоо оруулсан 33 дахь гоол юм.
Тэрбээр энэ улиралд "Байерн"-ий төлөө бүх тэмцээний хүрээнд 41 тоглолтод оролцохдоо 40 гоол оруулаад байна. Кэйн Бундес лигийн 30 тойргийн дараах байдлаар найман гоолын илүүтэйгээр мэргэн буучдын жагсаалтыг тэргүүлж байгаа юм.
Германы дээд лигийн хувьд, аваргын хувь заяа хэдийн шийдэгдсэн бөгөөд өнөө жил "Леверкузен"-чүүд "Байерн"-ий 11 дараалан түрүүлсэн үнэмлэхүй цувралыг зогсоож, Бундес лигийн царыг анх удаагаа өргөхөөр болсон билээ. Харин "Байерн"-д үлдсэн цорын ганц найдлага нь Аваргуудын лиг бөгөөд тэд эл тэмцээний хагас шигшээд Испанийн "Реал Мадрид"-тай тоглоно.