1 мин

Домогт хамгаалагч Тиаго Силва энэ улирлыг дуусгаад "Челси"-гээс явна

У.Чинзориг 2024.04.23 1

Английн "Челси" клубийн хамгаалалтын ноён нуруу Тиаго Силва энэ улирлыг дуусгаад чөлөөт агентийн хувиар багаа орхино. Тэрбээр Нэгдүгээр сард "Челси"-гээс явах боломжтой байсан ч, адармаатай улирлын туршид багтаа бүтэн үлдэж, залуу тоглогчдод туслахыг хүссэн юм.

Нутгийнх нь "Флуминенсе" клуб түүнийг удаан хугацааны өмнөөс сонирхож байгаа ч, Силва харин бүх саналыг нээлттэй сонсоно гэж мэдэгдэв. Гэхдээ Силва залуудаа тус клубээс хөлбөмбөгчийн замналаа эхлүүлсэн билээ.

Тэрбээр ярилцлагадаа “Би "Челси"-д дөрвөн жил сайн тоглосон. Премьер лигт 39 настай өндөр түвшний тоглогчийг харна гэдэг ховор үзэгдэл" гэсэн юм.

Силва бямба гарагт Уэмбли цэнгэлдэхэд явагдсан ФА цомын тоглолтод "Манчестер Сити"-гийн эсрэг тоглосон агаад 1:0-ээр хожигдсоныхоо дараа уйлж харагдсан билээ. Учир нь энэ улирал түүний хувьд, Европ дахь сүүлчийн улирал байж магадгүй юм.

Тиаго Силва "Челси" клубт дөрвөн жил хүчин зүтгэхдээ 149 тоглолтод оролцож, есөн гоолыг оруулсан бөгөөд Аваргуудын лиг, Европын Супер цом, Клубүүдийн ДАШТ-д түрүүлсэн билээ.

У.Чинзориг 2024.04.23