Чөлөөт бөх: Чамизогийн барилдааныг шүүсэн шүүгчдийг шийтгэлээ
ДБНХ-ны Сахилга батын хорооноос Италийн бөхийн холбооны гомдлыг авч хэлэлцлээ. Италийн тал Бакуд болсон олимпын эрхийн тэмцээнд шүүгч нар илт нутгийн тамирчны талд шүүж, Франко Чамизог ялагдуулсан гэж мэдэгдээд байсан. Энэ барилдаанд ялсан туран байрамов олимпын эрх авсан билээ.
ДБНХ-ны мэргэжилтнүүд тус барилдааныг дэнслэн шалгаж, шүүгч нарын зарим үйлдэл буруу байгааг тогтоож, тэдэнд шийтгэл оноолоо. Үүнд: Роман Павлов, Ибрагим Чичиоглу хоёрыг 2024 оны 12 пугаар сарын 31, Али Сайваныг есдүгээр сарын 30, Камела Буазиза, Кейси Гессла, Алексей Базулин нарыг зургаадугаар сарын 30 хүртэл шүүх эрхийг нь хаслаа.
Гэхдээ нэгэнт ялагчийг зарласны дараа шүүгчийн шийдвэрийг өөрчилж болдоггүй дүрэмтэй тул туран Байрамов ялагч, олимпын эрх авсан хэвээр үлдлээ. Хохирогч Чамизог дэлхийн эрхийн тэмцээнд хэсэг толгойлж барилдах эрхээр хохирлыг нь “барагдуулжээ”. Харин 300 мянган ам.доллар гэсэн их хэмжээний авлига байсан эсэх талаар баталгаа баримт олдоогүй байна.