Франк Чамизо ДБНХ-г шүүмжиллээ
ДБНХ-ны Сахилга батын хорооноос Италийн бөхийн холбооны гомдлыг авч хэлэлцээд Бакуд болсон олимпын эрхийн тэмцээнд Италийн Франко Чамизо, Азербайжаны Туран Байрамов нарын барилдааны шүүлт буруу болсныг хүлээн зөвшөөрч, шүүгч нарын эрхийг 2-8 сараар хассан. Харин хохирсон Чамизод ирэх олимпын эрхийн тэмцээнд хэсэг толгойлох эрх олгосон билээ. Гэхдээ ДБНХ-ны дүрэм ёсоор нэгэнт өнгөрсөн барилдааны дүнг өөрчлөх боломжгүй тул Туран олимпын эрх авсан хэвээр үлдсэн.
Чамизо инстаграм хуудсандаа “Баярлалаа ДБНХ. Шүүлт буруу гэж угаасаа бидний мэдэж байсан зүйлийг бидэнд мэдээлжээ, та нар. Би олимпын эрх авахын төлөө дөрвөн жил хөдөлмөрлөсөн. Харин миний энэ эрхийг булаан авсан хүмүүс хэдхэн сарын шийтгэл хүлээлээ. Энэ шүүгч нар яаж толинд харж чадаж байна вэ? Бурхан бүхнийг харж байгаа. Харин би урьдын хэвээр хөдөлмөрлөн, энэ шударга бус байдлыг даван туулах хүч чадалтай болно” гэж шүүмжилжээ.